Aunke ta tiki e informacion cu te awor a wordo comparti pa loke ta trata impuesto BBO na frontera cu manera a wordo informa ta bay wordo implementa dia 1 di juni, ayera medionan di comunicacion a haya un comunicado di minister di Finanzas tocante e topico aki.

Diabierna siman pasa, minister di Finanzas, Xiomara Maduro, hunto cu expertonan di Departamento di Finanzas, Departamento di Aduana y Departamento di Legislacion a reuni cu e Comision Financiero di Parlamento pa informa riba e propuesta di Ley pa cobra BBO na frontera.

E mesun siman pasa, e ley a wordo manda pa Raad van Advies pa e por cuminsa cana su caminda legal. Anticipando riba entrega di e concepto di ley na Parlamento y minister Maduro a bay informa Comision Financiero di Parlamento riba e contenido di e ley pa introduci cobransa di BBO na frontera.

E mandatario a cuminsa splica cu na comienso di aña 2023, a introduci e Plan di Impuesto 2023, den cual a indica cu parti di e plan aki ta pa cobra BBO na frontera cuminsando 1 di juni 2023, lo cual segun nan esaki a bira necesario pa asina por mehora e cumplimento cu ley di BBO. Minister Maduro a enfatisa cu “e cobransa di BBO na frontera no lo mester tin efecto di subida di prijs, ya cu tur BBO cu wordo paga adelanta por wordo reduci di e BBO cu mester paga riba e volumen di benta. Pues e BBO no mester acumula pa asina wordo refleha den subida di prijs”.

Minister Maduro a gradici Comision Financiero di Parlamento pa e oportunidad di por a brinda informacion y a finalisa informando cu “den e tempo nos dilanti mas informacion lo wordo brinda na Parlamento, na gremio comercial y na comunidad en general riba e Ley pa cobra BBO na frontera”.

Directora di DIMP Luanne Gomez-Pieters a haci un presentacion amplio di e contenido di e ley, y despues di esaki, parlamentarionan a haci nan pregunta, na unda cu minister Maduro y e expertonan a percura pa contesta y splica mas den detaye ki efecto e ley ta premira pa tin den practica.

Den un entrevista cu 24ora, Gomez-Pieters a señala cu nan a cuminsa prepara e caminda formal cu mester bay cana pa cambio di ley cu tin pa loke ta trata e Plan di Impuesto 2023 den su parti 1 cu a wordo aproba pa parlamento na luna di december. Den presupuesto ta poni cu 1 di juni di e aña aki, ta bay cuminsa cobra e BBO na frontera y esaki ta un ley cu a wordo presenta caba na parlamento na februari 2020, pues e no ta algo desconoci pa parlamento y no a cambia hopi di loke ta e concepto.

Den su pensamento, Gomez-Pieters a sigura cu no ta asina cu ta bay tin aumento di prijs. Ta bay tin un sistema diferente cu ta paga e BBO adelanta manera cu ta sosode awor over e volumen di benta. Tambe el a splica cu na momento cu un persona cumpra un producto na Aruba na un comerciante local, e ta paga 7% di BBO, pero si e mes ta cumpra riba internet na futuro tambe, e tin cu bay paga tambe e mesun 7% di BBO, cual ta algo cu nan ta haya ta bon y ta crea un “leveled playing field” pa mercado local.

Di otro banda, por a mira diferente reaccion riba rednan social di e topico aki como esun di ex parlamentario Daphne Lejuez, ken a splica lo siguiente: “Bo tin un compania cu ta bende producto cu ta bin asurti y bo tin custumber di importa un asortimento pa por garantisa e miho escogencia pa bo clientela. Awor adicional na e invoerrechten mester bay paga BBO adelanta riba e mercancia ora di importa esaki, sin niun siguransa cu lo bay bende e producto. Di unda e compania aki lo mester bay genera e cashflow pa por financia e BBO adelanta aki, sigur mirando cu e no tin e producto bendi caba? Kisas (si no ti e cashflow) lo mester busca un linea di credito na banco (pagando interes mensual). Di unda e compania lo bay genera e placa extra aki cu e tin mester? E lo mester bay aumenta su prijs of reduci su asortimento y tene na un minimo? Of tur dos? Esaki lo nifica cu e consumidor sea ta paga mas pa tin menos escogencia di producto?.”

Tambe, el a trece dilanti cu DIMP a reacciona recientemente despues di un reunion cu parlamento, cu ta trata di crea un “leveled playing field”, esta “competencia husto” pero pa ken? E argumento cu companianan local lo no por competi cu e Amazon nan di mundo ta e argumento y cu hasta lo kier bay asina leu na cobra e ciudadano BBO na frontera ora di importa mercancia pa uso personal (adicional na invoerrechten). Bou di e capa di kier proteha companianan local (wholesaler) na Aruba.

“Mientras ta compronde cu kier yuda cierto ramo di nos companianan local, esaki no por wordo haci perhudicando otro ramo. A caso companianan cu ta bende retail lo mester wordo limita na cumpra for di wholesaler so? Lo no ta miho pa usa hermentnan ya caba obtenibel? Tur compania cu oficialisa mester inclui den su statuto e proposito di su negoshi, incluyendo e ramo y tambe si lo bay importa y/of exporta producto y ki tipo di producto. Pakico no ta cuminsa eynan? Y laga esnan cu NO tin e productonan specifica den nan statuut paga extra por ehempel?”

E ta indica cu asina “un compania cu por ehempel (e ta un ehempel, no un hecho! sans rancune) tin den su statuut pa importa y rebende mata, acesorio y servicio pa bende esakinan, lo no por importa corchon pa rebende toch?” Y tambe esnan cu ta importa producto a titulo personal, pero cu obviamente tin mas cu un dozijn of gross di un producto, mester presenta nan KvK ora di importacion sea via maleta of carga … dicon no cuminsa eynan en bes di aumenta e costo di haci negoshi pa TUR compania cu ta bende retail?”

Gremio comercial, como por ehemplo ATIA, a conta Bon Dia Aruba cu “nos lo haya un draft di e ley pa asina nos expertonan por prepara pa e sesionnan cu gremionan pa nos por duna miho input. Te awe ainda ATIA no a haya e concepto di e ley.” Herrick Henriquez a sigura.

Importante pa destaca cu ta falta menos di dos luna pa e ley aki por drenta na vigor y esey ta loke nan ta remarca, pa un ley no bay den pura atrobe nan mester a informa nan mas tocante esaki pa por tuma e medidanan of pasonan necesario.