Sindicato di Maestro di Aruba (Simar) ta abstene di bin cu cualkier reaccion riba e comunicadonan cu a wordo publica ultimamente, te ora cu nan ta sostene e reunion cu nan tin programa e siman aki cu minister di Enseñansa.
Sinembargo recientemente Secretario di Simar, Maroushka Cornelie
a declara na Bon Dia Aruba cu actualmente ta existi diferente preocupacion cerca e gremio di docente, y no solamente e situacion cu a surgi cu e grupo di manager di EPI.
Un preocupacion tin di haber cu e docentenan cu ainda den edad di pension nan ta trahando. Otro banda e falta di estimulo cerca e generacion nobo di docente pa locual ta nan salario. Nan ta punto cu ainda Simar ta trahando riba dje.
El a bisa na Bon Dia Aruba cu nan ta puntonan cu semanalmente ta ariba mesa di Simar, ya cu ta cosnan cu como pais chikito ta un poco dificil pa atende cu nan.
Docentenan pensionado
Pa loke ta e situacion di e pensionadonan riba tereno di enseñansa, aworaki nan tin algun casonan pendiente di algun di nan cu ta traha.
E ta haya cu nan ta casonan un tiki delicado cu e no por bay mucho den detaye ainda. Pero si Simar ta bin constata cu tin hopi pensionado cu ta traha. Ademas cu tin falta di maestro y p’esey tin mester di hopi pensionado ainda. Tambe tin trabou den e curriculum cu e hobennan no ta haciendo, ya cu e pensionadonan tin e conocemento y experiencia pa haci e trabou aki.
“Lo ta great cu e pensionado por bay cas trankil ora cu ta e momento. Hopi no ta di acuerdo cu edad pa bay cu pension. Lastimamente esey ta un realidad cu nos tin cu biba cun’e…”, asina secretario di Simar a bisa.
Apesar di esey tin varios pensionado cu ta scoge pa traha pero esaki ta un topico cu ta trece diferencia di opinion cun’e, segun Maroushka Cornelie.
