Cu eleccion adelanta pa dia 6 di december proximo, politiconan cu tabata preparando pa 2025 awo ta haya nan mes mester agilisa nan presentacion y drenta inmediatamente den campaña politico, pa maximisa nan impacto den eleccion.

Otmar Oduber – Plataforma Pais
 Maske e ta involucra ainda den caso Flamingo – acusa di iregularidad den otorgamento di tereno – ex-minister Otmar Oduber tin un tempo caba promoviendo Plataforma Pais. No ta conoci mucho detaye di Plataforma Pais, si tin mas miembro, si lo postula pa eleccion, etc. Caso Flamingo ta bin dilanti hues na november, y Oduber a bisa cu e ta spera cu e caso lo keda cla dia 2 di december. Esaki no ta laga mucho espacio pa campaña, y e mancha di un acusacion penal den caso Flamingo, cual tabata famoso pa e caso di “spookambtenaar”, lo ta afecta imagen di e politico.

Ryçond do Nascimento – Lucha pa Reforma
 Ex-miembro di AVP, parlamentario independiente Ryçond do Nascimento a bandona AVP na 2023, y na augustus di e aña ey a anuncia su partido nobo: Lucha pa Reforma. Durante e anuncio, Santos Do Nascimento a bisa cu tin e intencion ta pa reforma e aparato gubernamental, cuminsando cu Parlamento. E no a duna indicacion si e mes ta bay ta lider, con grandi e partido ta bay ta, ni tampoco a menciona ken e otro miembronan potencialmente lo ta.

Di e nomber, Lucha Pa Reforma, el a bisa cu e ta “hopi cerca di mi curason.” “Tres aña pasa mi a hasta busca e domain name pa un website cu e nomber aki, y esey a bira tambe e nomber pa e partido, Lucha Pa Reforma.”

Tocante e cantidad di miembro den e partido, el a bisa: “Pa cuminsa ora bo bay notario bo no por lanta un partido bo so. Nos a opta si pa mantene e grupo cu ta firma na notario chikito, pero nos a tuma varios paso pa lanta e partido, y mi ta sinti contento cu e decision.”

Di loke ta diferencia su persona for di e otro partidonan cu tin actualmente, Santos Do Nascimento a bisa cu esey ta “mi posicion pa cu matrimonio, unda cu e mayoria di partido na Aruba ta pro-matrimonio homosexual. Ami ta vocifera cu mi ta contra, y esey ta haci cu mi mester wak un otro opcion, y e ora mi no ta wak un otro manera miho cu un plataforma diferente.”

Leonardo Figaroa – Partido Direccion Politea
 Hoben Leonardo Figaroa, kende ta campañando riba e plataforma di “caba cu populismo”, tin algun tempo caba profilando su partido, Direccion Politea, pa eleccion. Maske el a expresa di no tin wowo riba un posicion como minister den gobierno, el a pone como meta pa drenta Parlamento unda e por tin un influencia.

Maske Figaroa tabata post regularmente riba su pagina di Facebook diferente opinion politico, tabata augustus 2023 cu el a cuminsa oficialmente su carera como politico. E tempo aya, el a bisa: “Nos ta sali cu pasonan firme y positivo. Ami kier Zaken Kabinet como un solucion real ban dialoga!!”