Caya Grandi a keda habri oficialmente pa autonan diahuebs ultimo dia 1 di december despues cu un grupo di comerciantenan di e caya aki a haci un peticion na minister di Transporte Ursell Arends unda a wordo informa cu a habri esaki pa cuater luna.

Caya Grandi ta habri pa automobilistanan pa cuater luna primeramente pa asina nan por monitoria si e decision lo tin efecto negativo of positivo ya cu Arutram no ta circulando den Caya Grandi debi na esaki.

Bon Dia Aruba a bishita algun comercio di e area aki y a puntra kico ta nan pensamento tocante e decision despues cu e caya tabata cera, pa cu esaki, Solangis Quintero a conta na redactor cu e tin diesdos aña cu su negoshi y nan a wak ora a tuma e decision di cera e caya unda e clientenan no a keda hopi satisfecho, “pa hopi biaha nan tabata cuestiona nos dicon no tabata laga e caya habri pa autonan pasa, nos mester conscientisa cu nos ta den un luga chikito y cu esaki ta un distraccion pa e hende, aworaki a nos y mi mes ta hopi contento cu nan a habri bek, pasobra esey ta bay yuda nos pa hende bin na caya mas motiva”, Quintero a sigura.

Nan ta contento cu e apertura segun el a bisa, alabes nan ta hopi gradici cu Gobierno di Aruba pa e iniciativa “nan a scucha nos y esey ta un bon comienso pasobra si un cos no ta sali bon, ta implementa otro cos pa purba pa haci’e un mehoracion y mi ta kere cu esaki ta bay keda un miho resultado pa tur”, el a sigura.

Awor cu luna di december a cuminsa nan ta espera di haya mas clientenan unda e luna aki manera Quintero a señala, den caya tin hopi hende pa cumpra, “a nos tabata kier e apertura hopi tempo pasa pasobra december ta un temporada pisa y tin hopi hende riba caya pero, si nan a habri diahuebs nos ta hopi contento toch pa nos sigui, aunke mi sa cu hopi hende ta bay keha pasobra e entrada di autonan ta bay keda riesgoso pa e peaton”, el a menciona.

Nan a haya hopi comentario tocante luga pa parkeer autonan pero nan a hiba e tema ey tambe na gobierno unda el a sigura cu “ta buscando un bon solucion pa parkeer, nan ta bay trece un sistema nobo cu ta bay implementa cu un bon structura, nan a cuminsa yuda nos cu esey y mi ta espera cu pa e proximo aña nos tin un miho resultado pa tur y pa nos clientela por bin mas facil na Playa”, el a finalisa.

Tambe, otro comerciante cu no tabata kier expresa su nomber a comenta cu “cu Arutram Caya Grandi a keda mesun cos, den luna di december e ta mas druk y ora Caya a habri e ta un riesgo pasobra autonan ta coriendo hopi duro unda nan no ta pasa pa wak e vitrinanan, nan ta usando e caya pa shortcut, loke por causa un desgracia”.

El a trece dilanti tambe cu e problema di parkeer di auto no ta solamente pa clientenan di e caya sino tambe pa trahadonan cu tin nan luga di parkeer sigura pero hendenan no ta respeta esey.

Den su opinion, nan a mester laga e tram pa esunnan cu no por cana distancia largo pa motibo cu esey ta un alivio pa nan pero mientras no tin conscientisacion di chauffeurnan pa no core duro den Caya Grandi, esey por trece como consecuencia un hecho lamentabel.

Mientras, minister Ursell Arends den un comunicado di prensa a informa cu na e momentonan aki nan ta buscando un balansa pa asina por atende cu e turistanan di barco segun nan schedule pa asina nan no cana.

Tin diferente opinionnan riba e apertura di Caya Grandi unda un otro comerciante cu tampoco a duna di conoce su nomber a señala cu esaki si ta algo di aplaudi pa motibo cu e por trece hopi beneficio pa comerciantenan den caya.

“Mi ta contento cu por fin tin movecion, despues di basta tempo ayera por fin nos a mira autonan pasa y clientenan ta bin un tiki mas, nos ta espera cu e december aki lo por ta un beneficioso pa nos tur cu tin negoshi den Caya Grandi”, el a finalisa.