Recientemente Bon Dia Aruba a publica algun parti cu den e charla di Fundacion Respetami, cu a tuma luga na MFA Paradera, a bin dilanti durante splicacion di e tema abuso sexual di hende homber.
Tin diferente motibo pakico hende ta comete abuso. E causa di abuso sexual ta varia di persona pa persona, asina Yanelis Botman-Jimenez, oficial di prevencion, a expresa. Un abuso hopi biaha ta resultado di problemanan emocional.
Un persona cu poco amor propio, of cu ta sinti e necesidad pa domina, por abusa sexualmente un mucha pa e sinti su mes poderoso, of sinti cu tin e dominio. Mayor cu problemanan sexual por cay bek riba nan yiu pa nan propio satisfaccion.
Tambe a splica cu alcohol of otro droga por hunga un rol. Uzo di alcohol of otro droga por reduci dominio propio, haciendo asina e posibilidad pa abusa sexualmente di un mucha, mas grandi.
Abuso sexual por cuminsa manera un impulso. Na cuminsamento e por ta un reaccion riba un evento of situacion yen di stress, pero e por desaroya den un manera cu ta inclui un actitud cu efectonan sexual serio.
Un otro punto cu a wordo menciona ta cu un abuso por a tuma un luga antes. Hopi abusado a experiencia abuso como mucha. E mesun abuso por pasa di un generacion pa otro.
Botman-Jimenez a remarca cu un abusado sexual por ta cualkier persona; hende homber of hende muhe. Mayoria ta hende homber, pero hende muhe tambe por abusa mucha y ‘por ta di tur edad’. Algun abusado por ta casi di mesun edad cu e victima.
E por ta un persona di cualkier rasa of posicion economico. Abuso ta un problema di hende rico of pober, bao di tur rasa y tambe e por ta di cualkier districto y bario. Abusadonan por ta di tur caminda.
