Durante e celebracionnan di fin di aña, ta tradicion na Aruba pa tira klapchi. Sinembargo, e uso iresponsable di klapchi aña tras aña ta resulta den accidente cu candela, cu algun biaha, por tin consecuencia desastroso.
E aña aki no tabata diferente, y por a nota varios caso di candela cu a tuma lugar.
Klapchi a pega yerba seco na candela y pasa pa e cas di dos persona di edad
Diahuebs anochi a drenta informe di cu tin un candela na un cas na Santa Cruz, mesora a dirigi tanto polis como bombero na e sitio. Na yegada di e patruya a bin compronde cu un klapchi lo a bini for di halto cay den yerba seco y a pega na candela, esaki a expande rapidamente pa e cas. Un taxista cu a pasa a bay paden pa rescata 2 persona di edad cu ta bibando na e cas. Ambos a ricibi kemadura. Na yegada di e ambulansnan nan a atende ambos victima e caballero cu a ricibi kemadura na su man y e dama cu a drenta den panico.
Candela di mondi basta grandi patras di Wema Santa Cruz a menasa un cas
Dialuna madruga a drenta informe di cu tin un candela grandi cu tabata menasa un cas patras di Wema Santa Cruz, mesora a dirigi tanto polis como 2 unidad di bombero pa e sitio. Na yegada di e patruya a nota cu e candela ta basta grandi pero un habitante mes tabata combatiendo y contene e candela. Na yegada di e prome unidad di bombero a inicia cu e combate pa domina y paga e candela rapidamente.
Polis y bombero a bay pa huma preto saliendo for di un cas na San Barbola
Diabierna atardi a drenta informe di cu tin huma preto saliendo for di un cas na San Barbola, mesora a dirigi tanto polis como bombero na e sitio. Na yegada di e patruya a bin nota cu aki no ta trata di un cas na candela pero si un candela di mondi. Na yegada di bombero mesora nan a paga esaki.
Kerstboom den sala a pega candela causa hopi daño
Diabierna mainta a drenta informe di un cas na candela na Tanki Leendert, mesora a dirigi tanto polis como bombero na e sitio. Rapidamente bomberonan a yega y a cuminsa cu nan trabaonan di combate. E famia mes y bisiñanan a yuda evacua e muchanan y a cuminsa basha awa riba e candela. Polis na su yegada a haya sa cu ta e kerstboom den sala pa via di un overload a pega na candela. Mesora bomberonan a domina e candela y contene esaki den e sala so.
