Dia 20 di november ta Dia Internacional di Derechonan di Mucha, un dia importante y uno cu hopi instancia rond di Aruba, cu ta dedica na proteccion di derechonan di mucha, ta subraya fuertemente. En conexion cu e celebracion aki, Comision Pedagogico Derecho di Mucha, hunto cu Ministerio di Husticia y Asuntonan Social y ATHA ta organisando un actividad no solamente pa celebra e muchanan, pero pa concientisa pueblo ariba e importancia di e dia aki.
Sra. Yvonne Geerman-Bermudes, directora di Centro pa Hoben y Famia y miembro di Comision Pedagogico Derecho di Mucha a elabora ariba e meta di e celebracion di Dia Internacional di Derechonan di Mucha.
Comision Pedagogico Derecho di Mucha ta consisti di diferente instancia ariba tereno di lantamento di mucha, instancianan manera Tienda di Educacion, Fundacion pa Nos Muchanan, Fundacion Respeta Mi, Wit Gele Kruis, entre otro. Comision Derecho di Mucha, conhuntamente cu Ministreio di Husticia y Asuntonan Social ta organisando pa di seis aña e siman di lantamento di mucha cu ta bay combina cu e celebracion di Dia Internacional di Derechonan di Mucha
Geerman-Bermudes a remarca cu e aña aki nan kier duna extra atencion na articulo 31 di derechonan di mucha. Articulo 31 di derecho di mucha ta pone enfasis ariba e derecho di e muchanan di por hunga den un manera sano. “Nos kier stimula esaki tambe pa medio di nos actividad,” el a resalta.
Franchesca Heinze, directora di Asociacion Trabao di Hubentud Aruba (ATHA), cu tambe ta forma parti di e Comision Nacional Derecho di Mucha hunto cu otro organisacionnan gubernamental, a splica cu 69 aña pasa Nacionnan Uni a declara e fecha 20 di november como e Dia Internacional di Derecho di Mucha y despues di algun aña lidernan global a uni na esaki
El a resalta cu e 54 tratadonan ta enfoca specialmente pa proteha mucha y no ta pa kita autoridad ni responsabilidad di e mayornan. “Ta importante si pa nos corda cu mucha ta imita loke nan ta wak y nos como comunidad, mayor, lider, guia tin e deber pa ta e ehempel,” el a enfatisa.
Heinze a señala cu den e siman aki tambe tin diferente organisacion cu ta organisando eventonan pa mucha, en conexion cu Dia Internacional di Derecho di Mucha, entre otro na Centro di Bario Playa Pabao, Centro di Bario Tanki Leendert, YMCA San Nicolas y mas.
Michella Steenvoorde Lacle, beleidsmedewerker na Ministerio di Husticia y Asuntonan social, a indica cu pa di tres aña consecutivo e ta e persona encarga cu e organisacion di e marcha pa e derechonan di mucha.
El a splica cu añanan anterior e marcha tabata sali for di plasa Nikky Habibe y tabata termina na plasa Padu. Pero e aña aki a tuma e decision pa combina e marcha cu e actividad di Comision Pedagogico y marcha lo ta saliendo for di YMCA San Nicolas y lo termina na Carnival Village na unda lo ta tumando luga e actividad special pa celebra Dia Internacional di Derechonan di Mucha cu lo tuma luga na Carnival Village cuminsando pa 3or di atardi.
