Diferente fundacion a uni pa combati adiccion y traficacion ilicito

FADA hunto cu varios fundacionnan a uni den conexion cu dia 26 juni venidero cu ta e dia internacional contra abuso di droga y traficacion ilicito na unda mundialmente nan ta enfoca pa conscientisa riba abuso na droga y tambe traficacion ilegal.

Pa cu esaki, Rish-Ann Ammerlaan a menciona cu ora ta papia di abuso di droga, nan no ta papia solamente riba abuso ilegal of droga legal cu tambe ta existi, tambe tin tabaco, alcohol y remedinan prescribi, ora nan ta papia di droganan ilegal nan ta papia di extasis, cocaina, marihuana, y diferente otro droganan di e tipo aki.

E uso di droga ta trece cune diferente problemanan di tipo social, financiero, economico y di salud mental, un persona cu ta haci uso di droga por yega na e punto cu e ta bay depende fisicamente y mentalmente di un substancia legal of ilegal cu ta yega na adiccion.

Ammerlaan a expresa cu FADA ta traha durante e aña riba e area di prevencion pa asina purba combati e uso y abuso di droga mediante charlanan y asesorianan na unda nan ta yuda hoben y den futuro nan lo kier yuda tambe personanan cu tin un of otro problema di adiccion.

Na momento cu ta papia di traficacion ilicito, por compronde dealmento, bendemento y tambe intercambio di productonan ilegal como traficacion di bestia, di hende y tambe remedinan.

Ta p’esey cu diferente organisacionnan cu ta traha riba e mesun meta cu ta pa evita uso y abuso di droga y tambe traficacion ilicito como CMMA (Coordination Center on Human Trafficking and Migrant Smuggling Aruba), FMMA (Fundacion pa Maneho di Adiccion), Fundacion Respaldo y FADA.

Arthur Comenencia di FMMA a expresa cu esaki no ta e prome biaha cu nan ta traha hunto cu FADA y diferente instancianan, e biaha aki nan ta enfoca riba adiccion y e rol di nan den e parti aki, FADA ta enfoca riba e parti prevencion pero nan di FMMA ta den e parti na unda e cliente caba a cay den adiccion.

Loka nan ta ofrece ta e vrijwillige basis na Centro Colorado y onder curatele stelling cu ta partner di KIA, manera Comenencia a informa y aparte di esey nan ta duna lezing na diferente scol tocante adiccion y kico ta e plannan ora cu un hende ta cay den adiccion, cu segun Comenencia “semper tin un pero pakico” y pa e motibo ey nan tin ekipo di psicologonan y psikiatranan cu ta duna tratamento pa esey.

Ademas, el a señala cu nan ta traha conhuntamente cu Cuerpo di Polis di Aruba y otro instancianan tambe como Voogdijraad, nan ta acentua nan trabou riba e voorgeleiding y pa yuda e persona sali for di adiccion, di e cual Comenencia a menciona cu “no ta un trabou facil, cu cada hende riba nan mes tin diferente sorto di adiccion”.

Conhuntamente cu FADA nan a forma hopi parti di Carusel y aworaki nan ta enfoca mas tanto riba e voorgeleiding cu lo ta bay amplia su mes riba e vrijwillige basis y cu cada adicto cu ta drenta Centro Colorado lo por sali y lo por duna testimonio di kico a wordo haci pa nan y kico lo ta e plannan pa nan, Comenencia a splica cu tin hopi plannan den e pijplijn pero nan ta enfoca specialmente den e parti di voorgeleiding, di duna e cuido y servicio pa e persona por sali for adiccion.

“Nos tin un trabou grandi pero conhuntamente nos ta wak union den nos partnertnan pa haci esaki y trece un cambio sigur den e mundo di prevencion y adiccion”, Comenencia a sigura.

Jeannette Richardson di CMMA (Coordination Center on Human Trafficking and Migrant Smuggling Aruba) cu ta director di scol pa polis di Cuerpo Policial y coordinador nacional di Traficacion y Contrabando di Hende na Aruba pa 12 aña caba, a comenta cu nan a wordo crea mas cu un aña pasa y cu nan tin tres tarea importante, pa duna informacion, educacion y asistencia.

Den e parti di informacion nan ta haci investigacion y ta haci analisis, den e parti di educacion tur organisacionnan cu ta di gobierno of di comunidad mes por pidi un training pa haya sa kico ta e indicadornan di traficacion di hende y kico nan por haci pa yuda un otro hende cu por ta den situacion aki.

Tocante asistencia Richardson a declara cu nan ta bezig pa traha un shelter pa victimanan di traficacion di hende unda nan por haya yudansa como un abogado, dokter of un trahado social pa por yuda nan den nan trayectorio pa sali for di e situacion ey.

Dr Hendrikus van Gaalen director di Fundacion Respaldo tambe tabata presente den e conferencia aki y a splica cu adiccion ta mesun cos cu cierto malesanan, e ta cuminsa na edad hoben den e mayoria di biaha y ta p’esey cu tin cu cuminsa haci prevencion for di hoben y laga hende bira consciente cu nan por haya un adiccion.

Asina mes, el a sigura cu tin diferente terapia pero mas importante cu esey ta pa crea un bon dominio social, esey ta nifica cu Aruba mester ta asina pa tur muchanan hoben y hende un tiki mas grandi pa no lo mester di droga pa kita nan stress.

Scolnan tambe ta hopi importante, van Gaalen a bisa cu ora ta wak cu un mucha ta keda leu for di scol tin cu laga sa kico ta pasa y pa e famia tambe, esey no ta un specialidad di Respaldo segun loke el a afirma, pero e ta algo importante.

“Tin hopi muchanan cu ta pensa cu marihuana ta un cos natural cu no ta un problema, pero door di esey e persona no ta haya gana di haci nada mas y por bira psicotico, e por ta e droga mas pio cu tin”, van Gaalen a expresa.

Tambe, el enfatisa cu tin cu admiti cu problema di alcohol, droga y otro adiccionnan ta hopi importante na Aruba, weganan tambe a bira un adiccion y tur esey mester wordo haya un bon manera pa reacciona riba nan , “si nos no ta haci esey, funcionalmente hopi hende ta bay atras”, el a afirma.