Recientemente Aruba Birdlife Conservation Foundation a publica riba nan pagina di Facebook cu e prome parhanan migratorio lo ta yegando Aruba pronto. Bon Dia Aruba a tuma contacto cu Sr. Greg Peterson di e fundacion pa asina haya mas informacion tocante e parhanan aki y con comunidad di Aruba por contribui na mantene e parhanan aki sigur durante nan migracion.

Sr. Peterson a splica cu Aruba conoce tres tipo di migracion di parha. Aruba ta ricibi cada aña, cuminsando for di februari, hasta 10 especie di Sternchi (Terns) cu ta reproduci na Aruba. E migracion di parhanan di lama aki ta termina na augustus.

Despues tin un di dos tipo di migracion di parha, cu ta consisti di algun parha cu ta biaha for di Colombia y Venezuela pa Aruba y despues regresa. Esaki ta e cantidad mas chikito di parhanan migratorio.

El a sigui splica cu e di tres y esun cu e cifra mas grandi den especie, ta e migracion di ciclo anual di e parhanan cu ta biaha for di Norte America pa Sur America ora cu e lunanan di winter ta yegando na e Norte. Esaki ta dura for di augustus te cu april. Despues e parhanan ta regresa pa Norte America den e temporada di reproduccion, yegando asina leu te na Canada y Alaska.

“Cu e comienso di e migracion norte-sur, Aruba ta prepara pa ricibi su bishitantenan cu ta retorna anualmente,” el a resalta.

Pa loke ta trata e tipo di parhanan cu por spera, Peterson a indica cu durante un bon aña di migracion, Aruba por spera mas cu 50 diferente especie di parha. E cantidad ta grandi, por lo tanto sr. Peterson ta menciona solamente algun di e especienan cu ciudadanonan tin un bon oportunidad di mira canando den e naturalesa di Aruba.

E prome especie cu ta yega ta e Swalchi. Parhanan chikito y hopi rapido. Esun mas conoci ta e “Barn Swallow” (Swalchi).

E parhanan predador mas grandi cu ta regresa cada aña ta e Osprey. Localnan ta yamele e “Gabilan Piscado” of “Teishi”. Un cazador di pisca y frecuentemente por ser mira cu ta caza e piscanan for di halto den shelo den a area di Bubali y Spaans Lagoen.

Peterson a sigui splica cu Aruba lo ricibi tambe diferente especie di patonan. Dos di esnan ta reproduci na Aruba cu ta e Pato di aña (White-cheeked Pintail) y e Pato pigigi barica preto (Black-bellied Whisling Duck).

El a indica cu por spera di mira por ehempel un minimo di 5 especie di egretanan (egrets and herons) cu lo aparece na e wetlands di cual e mas grandi ta e Garsa blou grandi (Great Blue Heron).

Peterson a agrega cu parhanan di costa tambe lo ta yegando. Esaki ta parhanan chikito cu por ser mira ta cana na e playanan y mayormente na e wetlandsnan, principalmente e Lopi (Plovers) y Snepi (Sandpipers), manera e Lopi gris (Black-bellied plover) y e Snepi mauri (Western sandpiper).

Aruba tambe lo ser bishita pa diferente Tyrano (Flycatchers) manera e Tyrano rabi forki (Fork-tailed Flycatcher).

Ciudadanonan tambe por spera pa wak diferente tipo di Chipe (Warblers), cu tin e mesun forma cu e parha local Parha di Misa, pero cu nan propio colornan y canticanan, manera e Chipe pechi preto (Blackpoll Warbler).

Ademas di e diferente especienan di parha, cada aña Aruba tambe ta ricibi e animal mas lihe na e planeta. E Falki peregrino (Peregrine Falcon).

Peterson a splica cu cada un di e parhanan migratorio tin nan propio dieet, cada un tin nan cuminda cu nan ta come, for di pisca te lagadishi y insectonan. Tin tambe esnan cu ta come fruta of simia.

Pa loke ta e tempo cu e parhanan aki ta keda na Aruba, el a indica cu e temporada di migracion ta dura for di augustus te april. Sinembargo, e tempo di estadia di e diferente especie di parhanan migratorio ta varia. Algun especie ta haci un parada cortico pa descansa y come prome cu nan continua cu nan biahe. Otro especienan por keda pa e temporada di winter completo, probechando di e clima mas cayente y e recurso di cuminda abundante na nos isla.

“Reconoce parhanan migratorio por ta un trabou emocionante,” Peterson a resalta. El a señala cu e parhanan por ser reconoci pa nan tamaño, forma, color di nan pluma, sonidonan y comportacion. E uso di un buki di guia y binocularnan por yuda identifica e diferente especie.

Proteccion di e parhanan migratorio ta crucial pa nan sobrevivencia. Peterson a duna algun recomendacion pa ciudadanonan yuda cuida e bishitantenan:

  • Evita disturbio: Mantene un distancia sigur for di e parhanan pa evita cu ta spanta nan, specialmente den a rea unda nan ta come y descansa.
  • Controla e mascotanan: Mantene cacho y pushi leu for di e playanan y wetlands caminda parhanan ta reuni.
  • No duna cuminda na e parhanan: Mester laga nan busca nan propio cuminda den nan habitat natural.
  • Cuida e medioambiente: No laga sushi riba e playanan of otro lugarnan natural, esaki por ta dañino pa parhanan y otro animalnan.
  • Stuur mas poco poco: ora cu ta mira parhanan ta bula, ta importante pa bay mas poco poco ora ta stuur auto. Hopi di e parhanan ta bira victima di trafico.

Por ultimo, el a remarca cu e yegada di parhanan migratorio ta un espectaculo natural impresionante cu Aruba mester aprecia y proteha. “Cu e accionnan aki nos por sigura cu Aruba ta keda un refugio sigur pa e especienan increibel aki, permitiendo nan pa continua nan biahe migratorio cu exito,” Peterson a enfatisa.