Recientemente riba rednan social diferente usuario ta haci comentario y cuestionamento di loke ta trata un “maneho nobo” pa admision e cual debi na necesidad di trahadonan den mercado laboral mester di implicacion politico nobo pa loke ta trata permisonan di residencia y di trabou.

Den un documento e cual Bon Dia Aruba ta dispone di dje, ta señala cu e maneho nobo e cual tin fecha di augustus 2024 bao Ministerio di Labor, Energia y Integracion ta splica cu for di 2020 e minister di Asunto Social y Labor hunto cu esun di Husticia, Seguridad y Integracion, a emiti un serie di instruccion politico pa asina duna contesta na impacto economico di pandemia Covid-19 na Aruba. Loke a haci necesario pa tuma medidanan, entre otro, pa protege economia di Aruba y mercado laboral cu a bin ta cambiando.

For di comienso di aña 2022, sector comercial, mediante un carta di dia 6 di april 2022, a duna señalnan di scarsedad di trahadonan den mercado laboral local y a solicita atencion urgente loke a hiba e introduccion di dos instruccion di politica na augustus y november 2022.

Pa aña 2024, ta spera un crecemento economico di 8.5% mientras cu prevision pa 2025 ta di 1.3%. Manera Banco Central di Aruba (CBA) y Departamento di Asuntonan Economico y Comercio y Industria (DEZHI) a afirma den nan publicacion tocante desaroyo economico di Aruba.

Ademas, a establece cu Aruba ta bay conta cu 1,650 camber di hotel adicional for di 2023 te cu 2025 a traves di proyectonan hotelero y cu desaroyo economico menciona anteriormente tin consecuencianan directo pa evolucion di e mercado laboral.

Tumando na cuenta cu e pronosticonan economico, ta anticipa cu e tasa di desempleo lo keda abou y un tasa di desempleo abou ta traduci hopi lihe den un scarsedad di labor debi cu casi no tin personanan desemplea, mientras cu, di otro banda, tin un cantidad di proyecto importante den preparacion cu tambe lo determina e crecemento economico den e proximo añanan y esaki ta nifica cu lo mester di mas trahado pa yena e vacaturanan cu a presenta, cual, manera lo mira despues, ya a indica varios biaha door di e organisacionnan di dunadonan di trabou y trahadonan.

Segun e proyeccion di poblacion realisa door di Estadistica Hulanda (CBS) pa añanan 2020 -2040 y teniendo na cuenta e cantidad di cambernan di hotel planea, Aruba mester spera un crecemento di poblacion di alrededor di 5,052 persona. Solamente 4% di e personanan aki lo a nace na Aruba, mientras cu e grupo mas grandi mester ta consisti di trahadonan di afo. E proyeccion di CBS tambe ta indica cu e grupo mas grandi lo ta den e categoria di edad di 25 pa 44 aña (43%), cual SVb ta considera e categoria di edad mas deseabel, sigui pa e categoria di edad di 45 pa 64 aña (30%) y hobennan (15-24 aña) (12%).

E oferta actual den e mercado laboral ta insuficiente compara cu e demanda actual den e mercado laboral. Por ehemplo, Camara di Comercio riba su propio iniciativa a haci un estudio exploratorio riba e mercado laboral den e lunanan di februari y maart 2024 pa determina cuanto compania no por yena nan vacaturanan debi na scarsedad di labor.

E sector comercial na comienso di 2024, den un carta cu fecha 16 di januari 2024, a expresa preocupacion extremo pa loke ta trata e mercado laboral local existente of creciente, debi na e echo cu, den su opinion, no a duna e atencion necesario na e Accion aki pa atende e problema structuralmente.

Despues di varios carta (cu ta contene recomendacion) di sector comercial riba e topico aki, a tene varios reunion entre 29 di februari 2024 y 18 di april 2024 cu (representantenan di) sector comercial, organisacionnan di empleado di sector priva,entre otro.

E discusionnan cu a tuma luga durante e reunionnan a resulta den un serie di recomendacion pa atende e scarsedad di labor cu actualmente Aruba ta confronta na un manera efectivo y eficiente, ya cu ainda tin un desaroyo economico significativo andando na Aruba, incluyendo no solamente construccion pero finalmente, explotacion di proyectonan hotelero nobo cu a aumenta e necesidad y demanda pa empleo di trahadonan (local), loke ta haci necesario pa introduci un instruccion nobo di politica amplio pero integral.

Den e maneho pa loke ta trata Sector Turistico Profesional, ta indica cu despues di e diferente ronda di consulta cu representantenan di organisacionnan empresarial y di trahado, lo amplia of habri parcialmente e lista di profesionalnan inclui den e Manual di Admision pa kendenan no ta necesario pa haci ningun test di mercado laboral via DPL y pues, nan ta exonera di dje.

Den documento ta splica cu “LISTA DI TRABOU PROFESIONAL: Den e sector di turismo cu ta aparece den e Manual di Admision ta ser amplia pa inclui e posicionnan menciona den documento aki, cu e indicacion cu e lista no ta exhaustivo y por -den caso di ta necesario – habri of por wordo complementa.”

Ademas, tambe ta papia di e distincion mas grandi entre inmigrantenan pa fecha di yegada:

Den cuadro di implementacion di e instruccionnan di politica aki, lo mester haci un distincion entre e categoria di “migrantenan ya presente” y “migrantenan nobo”, cu e fecha di yegada ta e criterio pa distingui entre e dos categorianan.

1 – Tur stranhero cu a drenta Aruba legalmente prome cu 1 di januari 2024 ta cay den e categoria di “migrante presente caba.” Esnan cu despues a drenta legalmente lo wordo clasifica como “inmigrantenan nobo.”

2 – Un migrante presente caba por, for di momento cu e ta biba legalmente na Aruba y ta den posesion di un permiso di estadia of di trabou, mesora entrega un peticion pa un permiso pa metanan di “Reunificacion Familiar”.

3 – Inmigrante presente caba cu a termina cursonan di por lo menos 12 siman den Enseñansa pa Empleo (EpE) cu exito, ta keda exonera di e test di mercado laboral.

Tocante e documento aki e cual tin fecha di instruccion dia 1 augustus 2024, ni minister Croes ni su ministerio a duna un declaracion publico di esaki, sinembargo, empleadonan di algun departamento si ta hayando presentacion di esaki.

Parlamentario Marisol Tromp ta haci preguntanan na minister Glenbert Croes tocante e maneho aki
Segun Tromp a señala mediante un comunicado pa prensa, e mandatario encarga cu Ministerio di Labor, Energia y Integracion, Glenbert Croes “a introduci un maneho nobo for di luna di augustus unda Parlamento di Aruba no a ricibi nada.”

Tromp ta sigura cu “te cu awe Gobierno di Aruba no a manda ningun estudio actual di Aruba su ‘carrying capacity’ . Nos sa cu Gobierno a publica cu Aruba tin un escasez di trahado, consecuentemente minister Glenbert Croes a bin cu un ‘maneho nobo’ unda cu e ta habri porta pa miles di trahado migrante bin biba y traha na Aruba. E pregunta ta ‘Kico ta gobierno di Aruba su pensamento y vision di Aruba su carrying capacity pa loke ta nos poblacion, nos turismo y e presion cu e cantidad di hendenan cu lo bin acerca lo pone riba nos infrastructura, nos vivienda, educacion, salubridad, etc.?”

“Si Gobierno na e momentonan aki no tin un estudio ni vision cla pa Aruba pe proximo añanan, ta con bo por habri porta pa miles di hende sin haci un estudio actual di nos capacidad di carga di nos pais y sin presenta y comparti esaki cu Parlamento di Aruba? N’e momentonan aki ya nos poblacion tin hopi presion y keho riba listanan largo di espera pa por ehempel, e parti medico, lista enorme di espera na FCCA pa loke ta vivienda, etc. Con e listanan di espera lo bira awo? Miles di persona lo bin y unda nan ta bay biba si tin escasez di vivienda?” e parlamentario ta puntra.

“A base di e maneho di ‘free for all’ di minister Glenbert Croes, mi a haci pregunta por escrito dirigi na minister di Labor, Integracion y Energia. Minister Croes a introduci su ‘maneho nobo’ (nieuwe beleidsinstructies) desde luna di augustus 2024. Parlamento di Aruba no a ricibi niun documento actualisa pero si por a tuma nota riba medionan social cu presentacionnan ta wordo duna.”