Minister di Finansa Angel Bermudez no sa for di unda tur informacion riba e bishita di e delegacion di International Monetary Fund (IMF) na Aruba a sali. Ya cu –segun e mandatario-  algun informacion no ta cuadra cu e declaracion oficial cu el a haya for di IMF mes.

“E statement aki ta e unico statement definitivo formal di IMF. No tin otro statement cu a wordo emiti dor di nan”,  e mandatario ta bisa. El a agrega cu a keda sorprendi na cuminsamento di e siman aki cu a wordo entrega diferente comentario den medio di prensa “riba un IMF rapport cu ami no a haya”.

Diabierna tardi, minister Bermudez a haci e declaracion aki durante un conferencia di prensa cu a conta cu participacion tambe di prome minister Mike Eman y minister di Economia, Richard Arends. Un copia di e statement cu e conclusion preliminar di IMF a wordo entrega na e miembronan di presa presente tambe.

“Esaki ta loke mi a haya, y cu a wordo comparti awe cu boso nan y cu a wordo publica ayera door di IMF”, segun minister Bermudez. E  ta producto di un bishita di dos siman cu IMF a haci na Aruba, unda nan a haci un inventarisacion di nos situacion di financia publico y macro economia.  El a remarca cu e statement aki no ta e rapport definitivo cu lo sali denter di tres  luna, ya cu e tin su procedura cu ne.

Recomendacionnan
Referiendo na loke a sali den prensa tocante IMF su supuesto recomendacionnan entre nan pa privatisa AZV, minister Bermudez a indica cu e no a lesa esaki  niun caminda for di e statement cu el a ricibi di e organisacion internacional aki.  Encuanto e interpretacion cu a wordo duna na e statement preliminar di IMF, e ta asumi cu esaki a wordo hinca den un contexto politico. Pero el a reacciona bisando cu e no ta politico y p’esey e no ta bay contradeci e tipo di comentario ey. “Mi ta laga tur hende e libertad di expresion. Mi ta kere cu cada ken naturalmente ta trece dilanti loke e ta kere cu ta prioridad.”

Riba e parti di gasto di personal di parti di gobierno, minister Bermudez a laga sa cu no solamente nan a tende riba e punto aki for di IMF sino di Caft tur kwartaal di parti di Hulanda y te hasta politicamente di parti di oposicion. Segun e mandatario e reduccion di e gasto di personal ta parti di e trayecto cu nan ta canando.

El a remarca cu gasto di personal ta keda un parti substancial riba presupuesto “pasobra nos aparato gubernamental ta basa riba ser humano. Ta e hendenan  cu ta haci trabou y nan ta esunnan cu ta duna e servicio.” Eynan e ta haya cu mester evalua e calidad di servicio pa hacie mas eficiente pa  asina mantene e gasto di e concepto aki mas optimal posibel. P’esey nan a bin cu e VUT y cu personeelstop pa wanta e crecemento di personal, segun e minister.

Sinembargo e ta kere cu tin trayecto cu bo por yega mas lihe pa reduci nan debe nacional y e surplus por bira mas grandi. Pero mester bin cu medidanan mas rigido y drastico, entre nan mester kita hende locual lo trece cu ne cu e presupuesto pa onderstand ta subi. “Esaki ta e trayecto cu nos no kier cana”, el a bisa categoricamente.  Nan ta prefera  di cana e caminda menos traumatico caminda nan ta purba domina e gastonan pa yega na e meta di mehora financia publico, pero den un trayecto mas largo.

Consolida gastonan
Algo cu e mandatario a menciona for di statement di IMF ta un recesion den ultimo dos aña. Un situacion cu den un banda a wordo causa door di asina yama “fiscal consolidation”; y e ta considera e remarca aki husto. Minister Bermudez  ta argumenta cu den su maneho ta purba di domina e gastonan y aumenta e entradanan  a base di e presupuesto. E no tin duda cu si gobierno den e ultimo decada a sa  di cobra tur loke e tin derecho di cobra y cu ta riba caya; e ora ey e debe grandi nacional lo ta mita mas chikito y e gastonan di interes lo ta mas chikito tambe.