Recientemente nos redaccion a tuma nota di e diferencia di prijs di e remedi Otrivina Nasal spray na tres diferente botica.
Ta asina cu un ciudadano a cumpra esaki na Botica San Lucas y Botica San Nicolas na un prijs di afl 10.60, pero ora a pasa na Botica del Pueblo pa cumpra esaki e tabata tin un prijs di afl 18.10. E ciudadano a puntra e cahera dicon esaki ta asina caro y su contesta tabata cu e remedi aki ta scars y nan a haya esaki di Botica Eagle.
Segun un trahado di un di e boticanan a bisa cu e prijs ta sumamente halto mirando cu Avent ta e agencia cu ta distribui e remedi aki y tur prijs mester ta mes cos pa motibo nan ta bini di un solo cargacion.
AZV
Nos a papia cu director di AZV Anco Ringeling y e ta bisa: “Ta depende di e remedi y con esaki ta yega Aruba. E dos remedinan mas importante ta e asina yama remedinan generico, esey nos tin un palabracion cu e boticanan cu tin un prijs maximo di cual no por wordo bendi mas cu e prijs cu AZV a stipula.”
Sr. Ringeling ta bisa e remedinan di marca asina yama brenchmark ta depende con nan a yega Aruba, si esaki a bini via e importador, e botica ta cumpra esaki y nan ta haya un prijs cu nan a paga di e importado y riba dje nan ta haya un recept regel voerders. Recept regel ta encera cu pa cada remedi cu nan ta duna, nan tin un prijs fiho pa asina cubri nan gasto di edificio personal etc. Ta sosode tambe cu e remedi normal cu ta drenta Aruba via e importado ta out of stock y e botica mes e ora por bestel e remedinan aki cualke caminda pero e mester tin aprobacion di e departamento di inspeccion di remedi. Ora cu e botica mes haci esaki e ora ta otro manera, ta depende unda nan a cumpra esaki pa wak cuanto esaki a costa. Si por ehemplo nan cumpr’e na Canada, e lo tin otro prijs cu si nan mester cumpra esaki na Hulanda.
Sr. Ringeling ta bisa si ta un remedi cu no ta wordo cubri pa AZV of un remedi over the counter, ta depende unda e botica a cumpra e remedi y si ta algo cu no ta cay bou di AZV, e botica ta liber pa pone su prijs y aki ta unda bo ta haya e variacion di prijs.
