Minister di Educacion Michelle Hooyboer-Winklaar ta descarta tur acusacion haci contra dje den e caso di Insure2Study. Veredicto recien di huez lo tabata a base di ‘evidencia fabrica’, segun e mandatario.
E mandatario a reacciona riba alegacionnan cu e mayor partido di oposicion a haci contra dje, cuestionando e forma con e contract di seguro di studiantenan na Hulanda a wordo otorga; y con supuestamente un compania liga na su esposo lo a wordo privilegia.
Segun Hooyboer-Winklaar no tabatin violacion di nos leynan ya cu e companianan di seguro a bay den un destaho publico cumpliendo asina e procedura hancra den nos leynan.
Ademas el a laga sa cu e cambio aki di compania pa atende cu e seguro di studiantenan na Hulanda lo a beneficia nan grandemente, ya cu cualkier reduccion cu nan por haya lo ta na beneficio di e mesun studiante.
Compania di seguro
Dicon nan a dicidi di bin cu un cambio? E mandatario a laga sa cu nan tabata convenci cu esaki tabata e miho forma di por baha e gastonan di seguro di studiante. Na e momento ey nan no a realisa riba cuanto e gasto di seguro lo baha. Te ora cu for di Arubahuis nan a saca tur informacion, unda nan a ripara cu e cuentanan cu nan tabata paga antes na Boogaard Assurantiën, compara cu e compania nobo Insure2Study, tabata substancialmente mas halto. E cuenta a baha cu 6 miyon euro, segun e mandatario. “Un suma cu bo ta bisa, con por ta?”, el a bisa.
E mandatario a indica cu e diferencia aki ta demanda un investigacion, y nan ta investigando precies kico tabata atras di e prima anterior cu e por a baha asina hopi mas cu un escogencia nobo. El a agrega cu pronto nan lo sali riba e berdad pakico antes tabata mas placa y awor e suma a baha. E mandatario a duna di conoce cu e ta kere cu e situacion aki tin oposicion preocupa. Hecho ta cu Boogaard Assurantiën tabata wordo representa na Aruba dor di Miro Dabian, kende ta conoci di tabata un persona yega na lider anterior di MEP, Nelson Oduber. Hooyboer-Winklaar a indica cu despues di mas cu 20 aña cu e compania anterior tabata cobrando primanan astronomico, awor cu un escogencia nobo nan ta mira un reduccion hopi grandi.
El a bisa cu tin un mocion den Parlamento pa investiga kico tabatin su tras. Pero e proceso aki lo tuma su tempo, ya cu nos ta papiando di hopi aña, pero e ta convenci cu e berdad lo sali na cla.
Relacion di amistad
Encuanto si e compania di seguro cu a wordo otorga e seguro pa nos studiantenan na Hulanda tin laso di amistad of interes comercial cu minister su casa, e mandatario a reacciona bisando cu esaki ta loke e ta referi como “evidencia fabrica”. Ya cu considerando cu su casa, Detlef Hooyboer, ta director di compania di seguro Nagico, esey ta e link cu oposicion a purba di haci.
El a laga sa cu su casa tin un caso andando contra e corant cu a bin cu e noticia aki. “Mi ta spera cu esey lo wordo aclaria den e sentido cu mi casa no tin nada di haber cu esaki. Cu e no ta conoce niun hende eynan”, el a bisa.
E mandatario a lamenta cu e tipo di acusacion aki cu e ta considera sin base y producto di politica bieu ta wordo treci un biaha mas den publicidad. E ta reta e lider di e partido MEP di oposicion cu si tin un denuncia formal contra dje pa bay Ministerio Publico (OM), y haci esaki.
El a dicidi di no entama caso sino cu si oposicion tin algo cuestionabel contra dje, pa nan bay OM. El a bisa cu nan tin tur documento riba e proceso con e destaho a tuma luga, te hasta a entrega tur e dossier na oposicion. Segun e mandatario, oposicion a manda otro hende pa bay entrega cu acusacion na OM cu tambe a wordo rechasa.
E ta reitera cu no tin nada tras di e escogencia di un compania di seguro nobo pa atende cu e seguronan di studiantenan Arubiano na Hulanda. Sinembargo oposicion ta scoge di bay bek den e tipo di acusacion aki, mirando cu siman pasa durante e tratamento di presupuesto 2017, hopi informacion a sali na cla den direccion di e lider di oposicion.
Informacion
El a bisa cu den e documento (dossier) cu nan a entrega ta aparece informacion relaciona cu e compania di seguro encarga awor cu e seguronan di studiantenan na Hulanda. E informacion aki ta contradeci acusacion manera cu e compania aki no tin capital, no tin number di telefon, etc. “Nos a wak na final di dia cu tur esakinan a wordo rechasa…”, segun e mandatario encuestion.
“Ta hopi tristo pa wak un lider di oposicion cu ta scoge pa ripiti e mesun tipo di historia fabrica aki, mirando cu e no tin otro tipo di historia of niun otro critica cu por trece padilanti”, segun e mandatario.
El a bisa cu e noticia ta data for di 2014, y tambe a wordo haci hopi noticia rond di esaki; y e no ta descarta cu nan lo sigui cu mas. Te hasta el a lanta un caso contra e corant cu ta liga cu e partido di oposicion, pa nan rectifica nan acusacion.
Minister Hooyboer-Winklaar sinembargo a perde e caso. “Lamentablemente nan of nan abogado a presenta evidencia fabrica”, el a bisa. E mandatario a lamenta cu e hues no a wak pa motibo di esaki, y a duna un veredicto cu nan no ta di acuerdo, pero el a scoge pa no sigui cu mas caso di corte di prome instancia.
Tambe el a bisa cu e procedura pa kies un compania di seguro no tabatin nada di haber directamente cu su funcion como minister; sino cu otro personanan di otro departamento a traha riba esaki. Na final den su funcion como minister, e ta aproba e trabou cu e personal di otro departamento a haci pa cu e seleccion y procedura rond di un destaho publico.
Aunke e no ta descarta cu e seleccion di otro compania nobo di seguro a cay den mal tera cerca otro hendenan. Ya cu e ta percibi cu tabatin un deseo di cierto sector di por sigui cu e compania anterior, mirando cu kisas tabatin lasonan politico y a crea obviamente un disgusto cerca oposicion, segun minister Hooyboer Winklaar. E ta convenci cu na final pueblo lo por scoge pa nan mes kico ta e berdad.
