(AP)—Mientras e temporada di verano ta acerca na Sicilia, Italia, Anna Fiannaca ta prefera e promentonnan, berenhena y calabacin (zuchinni) cu su ruman homber ta cosecha en bes di e cuminda empaketa den supermercado.
E dama di 89 aña ta cushina tur cos desde cero y ta come mayormente vegetariano. Pero e ta atribui un gran parti si su continuo bon salud na ahustamento di su dieta pa loke ta mas disponible durante aña.
“Esaki ta djis e manera di bida na Sicilia, tumando loke e temporada ta duna bo,” segun Fiannaca, ken ta biba cerca di Agrigento. Comiendo un variedad di fruta y berdura ta un di e hopi aspectonan cu ta haci e dieta mediteraneo saludable. Esaki ta inclui un abundancia di pinda, bonchi y vet saludable manera azeta di oliva y pisca.
Pero expertonan di nutricion ta bisa cu no ta importa unda bo ta, cumprando producto den temporada ta un stap facil pa crea habitonan pa come saludable. “Comiendo cuminda di temporada ta un ruta pa crea un variedad mas amplio den bo dieta,” segun Sharon Gray, un dietista registra cu ta supervisa e programa di nutricion comunal na University of Connecticut.
Pakico come cuminda di temporada ta miho pa bo?
Consumiendo un variedad halto di fruta y berdura ta un parti importante di bon nutricion, bahando e riesgo di malesa cardiovascular, obesidad y otro malesa. Scogiendo loke ta mas den abundancia den mercado tur luna ta un bon manera pa cuminsa, segun Gray, ken ta ofrece tayernan di cushinamento saludable pa residentenan cu salario mas abao na Hartford.
Na New England, Merca, tomatinan di verano, berry y peach ta precede e papunanan, calabasa- y cranberrynan di otoño. Tur tin un contenido halto di antioxidantenan y fibra, y ta provee un variedad amplio di vitamina, mineral y carbohidratonan compleho.
E ta yuda cu productonan den temporada ta smaak miho. “Hopi adulto no ta gusta hopi fruta y berdura, pues di bo por haya algo cu nan gusta, nan por implementa esaki den nan dieta,” el a bisa. “Esey ta moviendo hende for di cuminda procesa pa prepara mas cuminda na cas.”
Consumiendo cuminda di temporada tambe ta nifica comiendo productonan local, segun Julia Zumpano, un dietista registra na e Cleveland Clinic, specialisando den prevencion y maneho di malesa. Banda di e beneficionan ambiental, producto local en general tin mas nutriente pasobra e ta hecha naturalmente y ta ser consumi mas pronto despues di ser cosecha.
“Bo ta bay maximalisa bo vitamina- y mineralnan eyden, e polifenol- y antioxidantenan cu ta e fundacion di con nos ta reduci e riesgo di malesa,” segun Zumpano.
Con pa cuminsa?
Cambia bo dieta ta rekeri un mente habri, segun Sean Heffron, cardiologo na e Center for Prevention of Cardiovascular Disease na NYU Langone Heart. E ta coseha pashentnan pa mira mas leu cu e broccoli, ciboyo y otro berdura cu ta disponible full aña.
“Habri bo mente pa ‘oh, mi ta mira hopi esparago, peach of alcachofa,’” Heffron a bisa. “E lo exposiciona bo na mas, y haci bo mas dispuesto pa purba come mas fruta y berdura en general.” Gray a nota cu mercadonan local (farmers market) a bira mas popular. Pero e ta recomenda tambe haciendo compras na cadenanan regional, cual tin mas chens pa bende productonan local compara cu cadenanan internacional.
E ta bisa hende pa wak e flyer- y borchinan den tienda pa mira kico ta na benta, cual usualmente ta un indicador di abundancia temporal. Banda di spaar placa, esaki ta permiti hende cumpra cosnan caro manera berries cu por pone den freezer pa come mas despues den aña.
A pesar di e beneficionan, expertonan ta adverti si cu comiendo cuminda di temporada no ta un cura pa malesa, y algun estudio a descubri cu hende den climanan mas frieu ta sufri di deficiencia nutricional den winter. Esaki ta nifica cu bo mester sigui cumpra berduranan full e aña.
“nos mester shete pa nuebe porcion di fruta y berdura tur dia,” Zumpano a bisa. “Nobenta porciento di nos no ta come suficiente.”
