E dieta ketogenico of ‘keto’ ta un tendencia popular cu ta involucra consumi un cantidad halto di vet y proteina mientras ta limita consumo di carbohidrato. Mientras ta bisa cu e dieta aki tin algun beneficio, manera reduccion di apetito y nivel di sucu den sanger, e hallazgonan di un meta-analisis nobo ta sugeri cu e dieta aki por ta malo pa curason.
Investigadonan na National Jewish Health a revisa e hallazgonan di estudionan cientifico den pasado riba dietanan ketogenico como tambe ayuno intermitente (intermitent fasting), hayando cu mientras ambos ta ‘parce di yuda hende perde peso a corto plaso, y evidencia modesto ta sugeri cu nan por contribui na salud cardiovascular’ – nan a skirbi den un comunicado tocante e hallazgonan aki – ‘e dietanan aki tambe ta permiti consumo di cuminda cu ta conoci pa aumenta riesgo cardiovascular y no ta probabel cu ta mesun eficiente pa preveni malesa cardiaco manera guianan nutricional bon estableci actualmente recomenda pa expertonan di salud’.
Como referencia, esnan cu ta sigui e dieta keto ta pone e curpa den ketosis, loke investigadonan a defini como un ‘estado metabolico den cual e curpa tin acceso reduci na glucose y na luga di esey, ta alimenta principalmente di vet’.
Es mas, mientras e investigadonan a bisa cu e keto diet ta yuda esnan cu ta siguie inicialmente baha peso, datonan ta mustra cu esaki ‘no ta sostenibel’ usualmente despues di un aña. “No ta cla si e perdida di peso ta causa pa ketosis of simplemente pa restriccion calorico”, nan a nota.
Mas specificamente tocante salud di curason, e investigadonan a mustra riba e cantidad di vet consumi pa esnan cu ta sigui e dieta keto – particularmente vet satura, ‘cual ta asocia cu un aumento di riesgo di malesa di curason y nivelnan halto di lipide den sanger’, nan a nota.
“Ademas tin evidencia cu consumi un dieta keto pa un periodo extendi di tempo por conduci na arterianan birando stijf, y varios estudio a haya cu esnan cu ta come un dieta keto tin mayor riesgo di morto”, segun e comunicado.
Sinembargo, tin algun beneficio di keto pa esnan cu ta sufri di diabetes, ‘cu estudionan mustrando mehoracion den nivel di glucose, como tambe reduccion di glucose y nivelnan di insulina den raton cu a come un dieta keto’, nan a skirbi. Sinembargo, mas investigacion ta necesario pa confirma e beneficionan reporta y ‘prome cu recomenda keto clinicamente’.
Pa cu ayuno intermitente, e investigadonana bisa cu algun estudio animal a mustra beneficionan manera longetividad, perdida di peso y reduccion di presion di sanger. Sinembargo, ‘expertonan tambe ta preocupa cu e hamber induci pa ayuno ta causa cu mas hende ta come di mas ora di come of haci decisionnan no saludabel cu tin efectonan adverso riba nan salud cardiovascular’.
“E riesgonan potencial di ayuno intermitente cu ta rekeri mas estudio ta inclui efecto di inanicion (morto di hamber) y con esaki ta impacta funcion di organo”, segun Dr. Andrew Freeman, director di prevencion cardiovascular y bienestar na National Jewish Health y co-autor di e estudio.
“Cu dietanan manera keto y ayuno intermitente, rednan social y medionan di comunicacion popular ta inunda cu promesa y advertencia cu den miho di casonan no ta verifica, y den pio di caso ta dañino pa bo salud”, Freeman a continua. “Dietanan recomenda pa expertonan di salud, manera plant-based of Mediteraneo, a ser studia extensamente pa seguridad y eficacia, y a demostra conclusivamente cu ta mehora salud cardiovascular.”
