Segun resumennan diario di Departamento di Salubridad Publico DVG pa e desaroyonan di e pandemia di Covid-19 na Aruba, riba diasabra tabatin un persona y riba diadomingo tres persona cu a fayece pa complicacionnan di Covid-19, e malesa causa pa e virus SARS-CoV-2.
Den su resumennan diario durante weekend ultimo, DVG a informa cu riba diasabra tabatin un total di 1151 caso activo di Covid-19, cu un tasa di positividad entre residentenan di 24 porciento y a registra un fayecido. Tabatin un fayecido riba diasabra, cu loke e total di fayecido a aumenta na 116. Tambe a registra un total di 102 caso nobo di Covid-19, di cual 17 ta turista y 85 ta residente, y 135 persona a recupera di e malesa.
Tambe riba diasabra tabatin 52 persona interna den Hospital Dr. Horacio Oduber, di cual siete tabata interna den Unidad di Cuido Intensivo ICU; 41 tabata isola riba piso general, tres riba piso di maternidad – cu ta trata di hende muhe na estado – y uno tabata riba pediatria, es decir un mucha.
Pa loke ta e cifranan di ayera diadomingo, DVG a informa cu 135 persona a recupera. A registra un total di 71 caos nobo di Covid-19, di cual 8 ta turista y 63 ta residente. E cifranan aki ta representa un tasa di positividad entre nos residentenan di 25 porciento. E cantidad di caso activo di Covid-19 ayera tabata 1084, y e cantidad di fayecido relaciona cu Covid-19 a aumenta na 119, cu fayecimento di tres residente.
Tambe ayera tabatin 51 persona interna den Hospital Dr. Horacio Oduber pa ricibi tratamento adicional pa Covid-19. Di esakinan, seis ta den Unidad di Cuido Intensivo ICU, 51 ta riba piso general, y un riba piso di maternidad – es decir un muhe na estado.
Igualmente, DVG a informa cu den ultimo 30 dia tabatin un total di dies residente cu a fayece debi na complicacionnan di Covid-19. Di esakinan, dos tabatin vacuna, y ocho no tabatin ningun vacuna.
Datonan di Covid di cual DVG ta dispone ta ilustra un aumento di casonan nobo, cu un averahe semanal di 122 caso pa dia y un averahe di tasa di positividad semanal di 30 porciento pa dia.
