Go Cultura Foundation a realisa un conferencia di prensa pa duna di conoce nan Foro Cultural cu nan ta organisando durante e campana electoral aki y cu lo tuma luga mañan na Cas di Cultura.

Edjean Semeleer fundado y embahador di Go Cultura Foundation a informa cu nan a tuma e iniciativa di organisa e foro aki debi cu nan ta sinti cu e conversacion tocante cultura, creatividad y industrianan cultural y creativo semper mester tin mas prominencia.

Nan ta mira cu aworaki cu pais ta den campaña electoral ta un bon momento pa papia di esey y pa haya sa di partidonan politico cu ta participando kico ta nan vision y kico ta nan plannan pa e proximo cuatro aña di gobernacion.

E foro lo tuma luga mañan diaranson 16 di juni na Cas di Cultura y ta cuminsa 6or di atardi, na unda dies partido politico cu ta participando den eleccion parlamentario a confirma nan presencia cu nan siguiente representante: di partido Accion 21 Raymundo Dijkhoff, di AVP Michael Lampe, partido MAS (te ciere di edicion aki nan no a confirma ken ta esun cu lo participa) partido MEP Xiomara Maduro , partido POR Rigo Santiago, partido PPA Lisette Malmberg, partido RAIZ Ivan Croes, partido RED Kinsasha van der bliek, partido Pueblo Prome Marcel Peña y partido UPP cu Sergio Marin.

El a remarca cu esaki ta un foro politico, no un debate politico, na unda den un anochi di dialogo y di conversacion e publico presente tambe lo haya un oportunidad di haci su preguntanan na e candidatonan cu lo t’ey presente.

Amy Richards cu ta moderador di e foro aki a manifesta cu pa nan como Go Cultura Foundation ta sumamente importante pa pone un luz briya riba e industria creativo cultural y aworaki mas cu nunca ta importante mirando cu Aruba ta den un temporada di eleccion.

Pa nan por logra e meta di por haya mas atencion y mas oido pa cu e sector aki, nan a dicidi cu determinacion y dedicacion pa kies topiconan cu esunnan den e sector aki a bin ta remarca cu tin kisas falta di oportunidad of desaroyonan cu kisas no por ta yudando nan den e sector pa nan por sigui crece.

Pa e motibo aki Richards a informa cu nan a prepara y organisa e foro pa por duna na e partidonan politico y e futuro gobernantenan e oportunidad pa nan presenta nan vision, plannan y proyectonan pa e industria aki y sector cultural mirando cu esaki pa algun añanan por mira cu ta falta un tiki di atencion.

E topiconan cu nan a wordo scogi ta por ehemplo maneho nacional pa cultura, creatividad den enseñansa, topiconan cu segun Richards ta pa motibo cu e industria y sector cultural ta afecta y tambe lo por beneficia varios aspecto y varios elemento di nan desaroyo.

El a comenta tambe industria creativo, desaroyo social, desaroyo cognitivo for di infancia y aspectonan di reforma legislativo y fiscal, ademas di e parti di financiamento cu semper ta un reto pa esunnan cu ta den industria aki.

Tambe nan lo tin e aspecto di industria creativo y turistico mirando cu den esey te aworaki ta e pilar mas grandi y nan lo kier crea un sinergia entre aspecto cultural y turismo, industria creativo y innovacion tambe pa nan mira con nan pro trece elementonan necesario pa asina nan por wak un avance den nan sector.

Tocante e foro aki segun loke nan a expresa ta importante pa nan delinea un tiki mas kico lo bira desaroyo di nan industrianan cultural y creativo, desaroyo pa loke ta conversacion di importancia di cultura y creatividad.

Mirando cu ta diesdos partido cu lo participa den eleccion di dia 25 di juni y pa e foro solamente dies a confirma nan presencia, Bon Dia Aruba a pregunta dicon tur partido no lo ta presenta den foro aki, pa loke Semeleer a indica cu nan no sa e motibo pakico e dos partido aki (HTC y CURPA) no a confirma nan presencia na e foro pero pa Semeleer esey ta un refleho cu e otro dies ta duna balor na esaki.

Tambe el a manifesta cu industria creativo ta componi di hopi hende na Aruba pero pa varios aña caba nan ta sinti desilusiona of e fantasianan cu e politiconan por presenta cu no ta mustra realisabel, pero cu e momento ta awor pa nan cuminsa conversa y ilustra dicon e ta asina importante.

Thais Franken cu tambe ta forma parti di e foro y di e fundacion a elabora riba e encuesta cu Go Cultura a lansa un par di siman pasa na unda el a sigura cu e idea di e encuesta aki ta pa nan por midi e pensamento di e hendenan pa cu e industria aki.

Nan ta haya hopi importante pa por inclui tur hende cu kier ta parti di e esaki, pa participa den esey por drenta na e Facebook page di Go Cultura Fundation, tambe el a declara cu nan kier pa hendenan di Aruba ta parti di e movemento aki pero tambe nan por sa kico nan ta pensa di e industria cultural.

E resultado preliminar di e encuesta lo wordo presenta durante e foro politico pa asina duna un indicacion tambe di kico ta e sentimento den comunidad, e resultado final lo wordo presenta na final di augustus comienso di september y lo wordo presenta tambe na parlamento nobo di Aruba.

E costo di e entrada pa e foro ta 35 AWG y lo ta hopi limita debi na restriccionnan di Covid-19, pa haya carchi di entrada por tuma contacto cu Go Cultura Foundation na 569.5442.