Dies guerrillero di disidencia di FARC a muri den un bombardeo di Forsa Militar di Colombia na departamento di Guaviare, mientras cu otronan a wordo captura, diamars ultimo fuentenan a informa.
13 tabata bou e mando di Miguel Botache, alias “Gentil Duarte”, e prome guerrillero cu a aparta su mes for di acuerdo di paz cu a wordo firma entre Gobierno y antiguo guerrilla di FARC na november 2016.
“Den un operacion conhunto di nos Forsa Militar y di Polis a wordo neutralisa 13 integrante di disidencia di FARC di e criminal “Gentil Duarte”. Dies di nan a muri den e desaroyo di e operacionnan aki y tres a wordo captura na Calmar, Guaviare”, minister di Defensa, Diego Molano.
E operacion ta esun di mas importante cu a tuma luga den ultimo añanan contra disidencia di FARC pa e cual Gobierno ta acusa cu nan ta organisacionnan dedica na narcotrafico.
E grupo bao e mando di “Gentil Duarte” ta e frente mas grandi di disidencia y, segun Molano, ta e responsabel di e “reclutamento di menor di edad, atakenan contra forsa publico, secuestro y extraccion ilicito di mineral”.
Alias “Gentil Duarte” tin bou su mando diferente grupo di disidencia cu ta opera principalmente na departamentonan di Arauca, Vichada, Guainia, Meta, Guaviare, Vaupes, Amazonas, Caqueta, Putumayo, Cauca y Antioquia.
E tres cu a wordo captura a resulta herido y a wordo atendi pa enfermero di combate, despues nan a wordo hiba cu helicopter na un centro asistencial, Ministerio di Defensa a detaya.
Segun autoridadnan, e echonan criminal mas reciente cu e grupo aki a atribui na su mes “ta e secuestro y despues asesinato di e sub-teniente di Ehercito Nacional Carlos Arturo Becerra na municipio di Puerto Concordia (Meta)”.
E grupo aki ta acusa ademas di “ehecuta accionnan terorista y delitonan como narcotrafico, extraccion ilicito di mineral y forsa e poblacion civil cu ta biba na departamentonan di Caqueta, Guaviare y Meta”.
