Dies compania interesa lo bishita instalacion di refineria

Ayera for di parlamento prensa por a haya mas informacion relaciona cu e refineria. For di e total 101 compania cu a participa den e destaho publico: Request For Expresion Of Interest (REOI) 1 Y 2 finalmente a wordo selecta 10 compania potencial pa e prome tabata pa refineria.

Ainda e di dos cu tabata pa un otro industria ta pendiente, aunke den e proceso di seleccion 25 compania a cumpli cu tur rekisito.

Parlamentario Endy Croes (MEP) a bin cu informa tocante ultimo desaroyo rond di e refineria a base di un reunion cu nan fraccion a sostene cu gobierno diamars ultimo. E comision encarga cu e proceso aki a scoge finalmente 10 compania of inversionista cu a pasa tur screening y Refineria di Aruba (RdA) lo cuminsa negociacion cu nan. E siman aki caba RdA y e comision lo invita e 10 companianan interesa pa pronto nan lo bin bishita Aruba. E no a menciona e nombernan di e compania mirando cu e proceso aki ta andando ainda.

E intencion tras di e invitacion aki ta pa e inversionista por haci un tour den e refineria pa tin un bista di nan infrastructura. Tambe e lo bira un oportunidad pa nan por sinta personalmente tanto cu e comision como cu RdA pa nan por haya tur dato y informacion pa nan por realisa e escogencia final. E escogencia lo ta e compania cu pais Aruba pa medio di RdA lo negosha un contracto final pa opera e refineria.

E parlamentario a laga sa cu gobierno su target ta pa e proceso aki bin cla na cuminsamento di november. Sinembargo fraccion di MEP lo pidi gobierno pa e proceso aki lo por bin mas prome. Eventualmente pa 15 di october of di tres siman di e luna aki, mirando e crisis cu nos pais ta confrontando financieramente pa causa di e pandemia.

Segun parlamentario Croes, si pa october nos lo por tin e proceso aki cla, nos lo tin 8 siman cu esun encarga y gobierno lo por negosha un contracto cu e operador nobo di e refineria.

For di departamento Economico nan a wordo informa cu haciendo uso di nan programa Maruba, nan ta mustra varios posibel scenario, si e contract ta wordo firma pa final di aña aki. Un scenario ta cu pa 2021 e compania lo cuminsa den un ritmo slow cu trabao di renobacion y e lo nifica un 16% pa cu nos economia. Pa 2022 e impulso economico lo ta 18%. Mientras cu pa 2023 e impulso economico lo alcansa 6%. “Nan ta impulso y estimulo hopi positivo cu nos por crece bek…” parlamentario Croes a declara.