Ayera mainta, Diego de Cuba di Sindicato di Trahadonan di Aruba (STA) a duna un declaracion na prensa pa trece dilanti su opinion tocante su retiro di Aruba Airport Authority (AAA) N.V debi na cierto rumornan cu tin den comunidad.

De Cuba a informa cu tur esaki tin un historia su tras. El a señala cu for di dia cu e manager di seguridad di aeropuerto a cuminsa traha na aeropuerto, “mi a sinti un vibracion hopi negativo di su banda pa cu mi persona y hasta tabatin un momento cu director di Recurso Humano e tempo ey a yama mi pa un entrevista, pa motibo cu e manager no tabata compronde dicon mi tabata haya liber pa atende reunionnan di sindicato.”

Den esaki, el a splica cu esey ta hinca den contrato colectivo y ta un derecho cu lidernan sindical tin pa atende reunionnan, na unda e manager, segun De Cuba a bisa, no a keda mucho contento cu esey.

Pa loke ta trata su retiro, De Cuba a bisa cu 21 di juni ultimo un hefe grandi cu ya caba a pasa seguridad for di oranan mas trempan a sali bay pafo y a pidi su persona permiso pa bay tuma un documento for di un persona. “Mi tin full vigilancia riba dje y tur lo cual ta sucediendo. El a tuma e envelop y el a bay back, logicamente el a zona door di e tunnel y esey ta un di e motibonan pakico nan a castiga mi, pasobra m’a laga drenta un persona den e tunnel y el a zona,” el a sigura.

Otro incidente cu De Cuba a conta cu tabatin, conforme na e carta di schorsing cu nan a manda na dje, tabata debi cu De Cuba laga un otro empleado den mesun situacion pero drenta cu un saco di cuminda di un restaurant, segun el a señala.

Dia 29 di juni, De Cuba a haya un yamada pa un combersacion pa splica kico a pasa precisamente, na unda el a sigura cu nan a compronde, “pero despues sorpresivamente, mi ta haya un yamada dia 3 di juli si mi por bin na unda nan a bin cu un carta riba mi, e cual tabata e carta di retiro, caminda mi no ta haya cu e cos aki e ta husto. Ora cu ma lesa e carta di retiro, nan ta insinuando cu mi a haci un eror masha grandi mes. Na aeropuerto tin cumindanan cu ta drenta tur dia sin cu nan ta pasa den mashin y e dos persona aki sa, a mi sa y tur hende sa, dus si tin cu kita Diego tin cu kita henter aeropuerto.”

Den e carta, manera el a conta tambe tabatin skirbi cu un di e personanan aki, esta e manager di seguridad di aeropuerto, a bay busca den grabacionnan for di 15 di april lo cual pa De Cuba esey ta nifica cu a wak 400 ora di video pa condena su persona.

“Lo cual cu el a haci e no tin pia ni cabes pasobra lo cual el a bin cune den e carta nunca mi a haya un castigo pe, mi no tabatin schorsing, ni un hende a yama mi pa bisa mi cu loke mi tabata haciendo tabata fout,” De Cuba declara.

Igualmente, el a bisa cu dia 4 di mei ultimo a pasa un incidente na aeropuerto, un incidente cu manera el a sigura, tabata un incidente cu De Cuba no por a duna mucho comentario debi cu ta algo hopi delicado y cu empleadonan cu a experiencia e incidente aki a sinti humilia cu nan a pidi De Cuba pa entrega un keho y pidi un investigacion di parti di internal audit di aeropuerto.

“Logicamente como lider sindical mi no por a nenga nan esey y e dos persona cu a haci tur esaki e dia ey, ta e mesun dos amigo di manager di seguridad na unda te hasta por haya castigo di prison y e no a bisa nada, ora STA a entrega e keho e bala a cuminsa lora y ora e ta sinti su mes na candela, unico opcion cu tin ta pa elimina Diego.”

Di su parti, e ta considera cu loke a pasa dia 4 di mei ultimo ta algo hopi sensitivo y cu ta algo cu por hinca pais Aruba den problema masha grandi y por mata e turismo.

“Awor tur hende por comprende con profundo e persecucion tras di e lider sindical aki ta, pasobra e persecucion aki no ta di awor, mi ta sali na defensa di e clase trahado sin importa bo color politico, rasa, credo, nada, mi ta sali na bo defensa pasobra esey ta mi deber como lider sindical.” El a expresa.

Segun el a comenta, esey ta e motibonan di pakico awor su persona ta na cas, debi cu e ta denuncia un hecho castigabel y condenabel cu e no por divulga den prensa pero cu e investigacion di e incidente ey ta andando na e momentonan aki.

Di mesun manera De Cuba a dirigi algun palabranan na CEO di aeropuerto, Joost Meijs, cu segun De Cuba a afirma, Meijs tin conocemento di kico a sucede dia 4 di mei ultimo pero el a sconde y awor ta esun cu a firma e carta di retiro di Diego de Cuba.

Di loke ta trata cu e sindicato, el a trece dilanti cu nan ta bay sigui traha y cu nan ta bringando un miho pension pa empleadonan di aeropuerto y cu Recurso Humano no ta tene na cuenta cu sindicato ni cu empleadonan nan futuro “nan ta dicidi di haci lo cual kico nan kier.”

Nan a pidi na mediador di gobierno pa asisti na un reunion cu AAA y nan no a asisti tampoco, nan a dicidi cu nan no ta bay honra e peticion di trahadonan unda De Cuba a informa cu nan ta bay solicita pa laga e trahadonan vota.

“Esey tambe ta un di e motibonan pakico bo mester colga e unico persona cu ta vociferando e dolor di e trahadonan na tripel A y tur e mal practicanan cu tin riba vloer,” De Cuba a expresa.

Pa finalisa, el a afirma cu sindicato ta bay entrega un keho oficial na International Leader Organization “pa tur e persecucionnan aki cu e lider sindical y tur e otronan cu a ser persigui tambe na aeropuerto pasobra e bagamunderia aki tin cu caba y mi retiro ta un locura y un inhusticia y p’esey nos abogado ta atendiendo e asunto aki tambe.”