Citgo por bay genera hopi trabao, pa cuanto tempo. Kico ta bay ta bay ta e consecuencia pa pais Aruba. Nos a haci un analisis profundo riba e profundo aki? Diego de Cuba, presidente di sindicato STA, ta duda masha di esaki. Tur hende ta contento, claro cu pasobra e refineria ta habri bek. Pero kico e ta bay nifica pa pais Aruba, kico e entradanan lo bay ta pa Gobierno di Aruba tambe. Loke tin e sindicato mas preocupa cu si berdaderamente nan lo bay wordo permiti pa bin cu un cantidad substancial di hendenan di Venezuela pa bin traha na Aruba y kico ta bay ta e beneficio pa pais Aruba. E lo ta bay ta bon of malo pa nos?
Esaki ta loke e sindicato kier trece den un balans, pero mester bin cu un aclaracion di parti di e gobernantenan y de Cuba ta kere cu ta na su luga pa Parlamento di Aruba ricibi tur e documentonan cu ta regarda e reapertura di e refineria, pa loke ta Citgo/PDVSA y ta spera cu e documentonan aki yega Parlamento lo mas pronto posibel pa pueblo den su totalidad por haya un claridad di kico berdaderamente ta pasando.
Acuerdo
Tin un acuerdo firma entre Gobierno di Aruba y esun di Venezuela. Tin un dossier cu ta consisti di 2000 pagina y si imagina 2000 pagina, ta un revision bastante formal mester haci y STA ta di opinion cu prome cu algo asina ey wordo firma, tin un comision cu ta traha riba dje, pero e prome nan yama pa mira e documentonan aki, ta parlamento di Aruba.
Kico tin di sconde, e sindicalista ta cuestiona, den e documentonan aki cu ainda parlamento no por pone man riba nan. Aparte di esey tur hende sa cu tin un problema grandi na nos pais bisiña Venezuela. No ta descarta un posibilidad cu por bin un guera civil eynan. Aparte di esey tin un situacion na Aruba cu ta hopi alarmante, caminda cu bo tin hopi stranhero, tin hopi hende cu a bin di afo, hopi di Venezuela y Colombia, cu tur respet pa esunnan cu ta traha aki riba.
Sa cu hopi di nan a bin yuda pais Aruba, pero tin hopi ilegal tambe trahando aki na Aruba. Esey ta trece cun’e cu no sa kico Citgo lo bin cun’e. Imagina cu si nan permiti pa bin mil, dos mil hende di exterior na Aruba, con nos lo por ricibi nan. Nos infrastructura ta suficientemente desaroya pa nos por acapara tur e hendenan aki, ta e pregunta.
A haci un inventario kico nos tin aki riba berdaderamente cu nos por yuda hinca den Citgo? Berdad ta traha riba helpdesk etc. Kico lo ta e salarionan cu lo wordo paga den Citgo, nan lo ta mesun cos cu Valero, mas halto of mas abao? Of nos lo ta promoviendo cheap labor atrobe? Loke e ta bay genera atrobe, ta si e hendenan aki mester bay practica cheap labor, pasobra nos por a mira cu cheap labor no a yuda pais Aruba cu nada.
Gobierno ta perdiendo di gana casi 40 miyon florin, cu no ta drenta caha di gobierno pa via di AZV. AOV, AWW, Loonbelasting, cosnan cu Gobierno por genera placa cun’e, cu tin derecho riba dje. Pero tin hopi compania cu no ta contribui cu esaki. STA a papia esaki specificamente den e sector di construccion.
Inventario di companianan
Por imagina cu na KVK tin mas compania di construccion inscribi cu tin hende cu ta traha den construccion. Eynan caba ta mira cu mester a haci un inventario na KVK y bisa cu e companianan no ta existi mas, etc. y si berdaderamente ta existi, mester haci un inventarisacion profundo, pa wak cuanto hende ta trahando den e compania y tin hopi mas cos cu ta bin cun’e. Awor pa cada compania mester tin un persona di siguridad trahando.
E preocupacion di STA ta grandi pa loke ta Citgo, pasobra no sa ki salario e hendenan aki lo bay gana, ni cuanto hende lo bin di afo pa traha den e companianan aki cu no ta yiu di tera. Nos mester ta hopi cauteloso di e situacion cu Aruba ta aden caba awor aki pa loke ta empleo, de Cuba a splica.
