(CBSNews)—Hende cu ta sigui un dieet Mediteraneo of MIND tin menos señal di malesa di Alzheimer den e tehido di nan celebro, segun un estudio nobo. Publica diaranson den un edicion online di Neurology, cual ta un revista medico di The American Academy of Neurology, e estudio a descubri esnan cu ta sigui e dieetnan aki enfoca riba productonan di mata tin menos placa amiloide y enredamento di tau den nan celebro compara cu personanan cu no ta come asina.
Un dieet Mediteraneo, cu tin patronchi di cushina tradicional di e region, ta subraya frutanan y berdura fresco, pisca, bonchi, pinda y granonan completo. E dieet MIND ta nifica “Mediterranean-DASH Intervention for Neurodegenerative Delay” y ta combina hopi elemento di e dieet Mediteraneo y DASH (“Dietary Approaches to Stop Hypertension”).
“E resultadonan ta positivo,” segun e autor di e estudio Puja Agarwal, PhD di Rush University na Chicago den un comunicado di prensa. “Aunke nos investigacion no ta prueba cu un dieet saludabel ta resulta den menos deposito di placa amiloide den celebro, cual tambe ta conoci como un indicador di e malesa di Alzheimer’s, nos sa si cu tin un relacion entre esakinan. Siguiendo e dieet Mediteraneo y MIND lo por ta e unico manera cu hende por mehora e salud di nan celebro y proteha nan cognicion mientras nan ta bira mas bieu.”
Despues di a conta pa e otro factornan den e 581 persona cu nan a studia, e investigadonan a descubri cu “personanan cu a cumpli cu e dieet Mediteraneo tin un averahe di placa y enredamento den nan celebro ekivalente na un persona 18 aña mas jong compara cu esnan cu no a cumpli cu e dieet.” Pa esnan cu a cumpli cu e dieet di MIND, nan cantidad di placa y enredamento tabata similar cu un persona 12 aña mas jong.
Mientras cu nan tabata mira e componentenan specifico di e dieetnan, investigadonan a descubri cu berdura di blachi tabata tin e beneficio mas grandi.
“Personanan cu a come un cantidad di berdura di blachi mas halto of 7 y mas porcion pa siman tabatin mesun cantidad di placa den celebro cu un persona casi 19 aña mas jong compara cu esnan cu a come menos, esta 1 porcion of menos pa siman por ehempel,” e comunicado a declara.
“E descubrimento cu berdura di blachi ta asocia cu menos señal di Alzheimer’s den celebro ta interesante pa hende considera pa añadi mas di esaki den nan dieet,” segun Agarwal.
Placanan amiloide y enredamento di tau den celebro ta conecta cu e desaroyo di Alzheimer’s, aunke e causa specifico no ta claro y investigadonan a nota cu nan por aparece den algun adultonan mayor di ken nan funcion cognitivo no tabatin daño.
E dieet Mediteraneo ta enfoca riba “berduranan, fruta y tres of mas porcion di pisca pa siman,” mientras cu e dieet MIND ta priorisa “berduranan di blachi manera spinazie y boerenkool entre otro berduranan…ta priorisa berries mas cu otro fruta y ta recomenda un of dos porcion di pisca pa siman,” e comunicado a splica.
Pero e estudio tin su limitacionnan. Participantenan tabata mas tanto di cuero blanco, no Hispano y mas bieu. P’esey e resultadonan “no por wordo generalisa pa otro populacion,” e comunicado a expresa.
“Mester mas estudio pa sigui establece nos descubrimento,” Agarwal a bisa. Mientras cu e estudio recien no ta prueba causa, e ta sigui investigacionnan den pasado cu asociacion similar entre nos dieet y e salud di nos celebro.
Na 2015, investigadonan a descubri cu e dieet MIND por reduci e riesgo pa desaroya e malesa di Alzheimer’s cu 53%. Hasta esnan cu no a cumpli completamente cu e dieet pero cu a sigui’e “basta bon” tambe a reduci nan riesgo pa Alzheimer cu un tercer, segun e estudio.
