(AP) – Sean “Diddy” Combs a admiti cu el a golpia su ex-pareha Cassie Ventura den un hotel, despues cu CNN a publica video di e atake, bisando den un disculpa cu e ta “berdaderamente disculpa” y cu su accionnan “no tin excuus.”
“Mi ta tuma responsabilidad completo pa mi accionnan den e video aki. Mi tabata indigna ora mi a haci esaki. Y mi ta indigna awo,” e magnate musical a bisa den un video publica diadomingo riba su cuenta di Instagram y Facebook.
E video di seguridad a circula diabierna unda por mira Combs, ken tabatin solamente un serbete blanco bisti, ta golpia y scop Cassie, un cantante cu tabata su protegido y pareha di hopi aña durante e tempo aki. E video tambe ta mustra Combs ta lastra Cassie y tira un vase den su direccion.
Cassie, ken su nomber legal ta Cassandra Ventura, a demanda Combs den november pa loke el a bisa ta añanan di abuso emocional, fisico y sexual. E demanda a termina den un areglo e siguiente dia, pero a causa un critica intenso contra Combs, cu varios demanda den su contra biniendo e lunanan despues, ademas di un investigacion criminal federal tocante contrabanda sexual cu a causa cu autoridadnan a drenta Combs su mansionnan na Los Angeles y Miami.
El a nenga e acusacionnan den e demanda, sinembargo ni su persona ni representantenan a responde na e video nobo te cu diadomingo.
