Bista di henter mundo ta riba Venezuela den e dianan aki, y cu razon. Tin tur indicacion cu e situacion na e pais ey ta bayendo nan un climax, ohala cu un final bon pa e pueblo. Pero, ta importante mantene na mente cu deseo so no ta suficiente pa kita un di e regimennan mas desastroso cu e continente a yega di conoce. Ta importante pa reconoce cu e posicion cu e grupo criminal cu a podera di e pais a logra, ta basa riba poder. Poder den su forma bruto, basa riba intimidacion y uso sistematico di arma di aresto, tortura y asesinato pa crea miedo den esnan cu ta presencia tur esaki.

E pregunta ta, con bo ta deshaci di un poder asina, cu a traves di e cuerponan uniforma ta domina y controla henter e pais, sin cu tin un resistencia arma cu ta reta e poder aki y cu ta cuminsa un lucha arma pa deshaci di e poder ey. Den otro casonan riba e continente aki tabatin un forsa arma organisa, manera e caso di Nicaragua den e lucha contra dictador Somoza, y e caso di El Salvador, unda e lucha arma no a logra un victoria total, pero en todo caso un acuerdo di paz, na 1992, cu a duna e frente di liberacion un posicion den e sistema politico cu nan a logra probecha, dunando e pais dos presidente caba. Cu nan tambe a haci nan mes culpable di corupcion, algo cu nan a priminti di lo caba cune, ta proba atrobe cu, di cualkier coriente politico e persona por ta, conservador o progresista, ta parce cu maldad ta manera cancer: e no sa haci distincion ni di nacionalidad, raza, descendencia, etc.
Pero Venezuela ta un caso diferente. Den binti aña gradualmente e pais a cay mas y mas den man di un coriente politico socialista, cu a cera un pacto di diablo cu e militarnan, pa crea un pais unda no solamente nan tin e poder absoluto, sino cu nan a sa di usa esaki pa nan propio beneficio. Esaki a crea un tremendo base pa un dictadura hopi stabiel, ya cu e contrincantenan politico, cu a refugia den un parlamento cu e narcodirigentenan por a ignora pa hopi tempo, pasobra nan no tabatin ningun poder real.

Sin embargo, nan a haya yudansa di un banda cu a tarda pa bin, pero cu semper lo t’ey ora ta trata di aventurero socialista cu ta kere den nan mesun modelo economico irealista. No a tarda pa nan a cuminsa destrui economia, pasobra esey simplemente ta e realidad y destino di e sistema politico cu nan kier hiba. Ironicamente, e unico ‘arma’ cu a yuda pa pone e regimen criminal aki den problema, ta e desastre economico cu nan mes a organisa. E unico problema tabata, cu a dura hopi prome cu e rumbo economico aki a yega na tal nivel di pobresa y hamber pa mayoria di e poblacion, te pa yega cerca di e collapse total di e pais. Y no ta cos chikito cu ta tumando lugar na e pais; poco biaha por a experimenta con un pais asina prospero, pero no pa tur hende tampoco, por a yega na borde di destruccion total asina. Na e momento aki e situacion ta yegando na e punto unda eherce e control completo ey riba tur hende y den cada skina di e pais, ya no ta pertenece na e posibilidadnan real mas. Esey e Chavistanan tambe sa. Y awor, na un momento cu nan no a spera, nan a topa cu e decision di e pais cu ta considera America Latino ainda como su traspatio, cu ta bira tempo pa pone orden den e cura di cas.

Pa di prome biaha den tur e añanan aki, e Chavistanan a bin ripara cu nan poder tambe ta limita, y cu ta nan mes a percura pa actualmente nan ta den un situacion vulnerable, unda ta posible pa ‘strangula’ nan economicamente, y pone nan na rudia, sin cu mester usa forsa militar bruto. Pa hopi aña, e regimen na Venezuela tabata hunga un wega doble: nan ta socialista, comunista, ta critica Merca tur dia, pero unda nan tabata warda placa? Na Merca y na Europa, no cerca nan amigonan Arabe, no na Rusia, no na China, no… den e hol di e leon, tratando di hunga e wega ‘capitalista’ na un manera ‘nice’, hasta cu refineria na Merca. Y ta esaki ta birando fatal pa e regimen, cu no por conta cu apoyo di e ‘aliadonan’ oportunista Chines y Ruso, pasobra nan a ‘yuda’ nan caba; loke nan kier ainda ta haya nan biyones paga cu crudo, punto.

Claro cu e strangulamento economico di e banda criminal aki lo trece mas miseria ainda pa e poblacion, pero esey por ta temporal. Esey no ta implica cu e regimen a cay caba. No por kere cu e hendenan aki ta bay entrega poder, sin un intento pa usa e unico cos cu nan conoce bon: violencia pa domina otro hende. Pero nan lo bin comprende un cos: tin poder mas grandi cu nan cu ta dispuesto pa usa esaki tambe…