Diamars Presidente di Francia, Emmanuel Macron a califica e regimen di Nicolas Maduro, como un dictadura na Venezuela. Macron a duna su opinion den un discurso caminda tabata papia di politica exterior di Francia.

“Nos conciudadanonan no por compronde e manera cu algun ciudadano Venezolano ta laga cu ta instala e regimen di dictadura na Venezuela,” e presidente di Francia a bisa.

Macron a condena e gobierno Chavista. El a bisa cu Maduro ta “un dictadura cu ta purba di mantene su mes riba pia, na un prijs humanitario unico den historia,” mustrando su preocupacion.

Den su prome discurso dilanti di e conhunto di embahador Frances, cu a reuni na Paris, el a recorda cu Venezuela ainda tin hopi recurso considerabel. El a bisa cu e ta cla pa traha cu aliadonan den su region, y asina purba di evita un aumento di e crisis na Venezuela.

Un siman pasa, ministerio di relacion exterior di Francia a condena e decision cu a sali for di Asamblea Constituyente di Venezuela, caminda nan tabata purba di tuma e funcionnan di e parlamento Venezolano. El bisa cu ta urgente reanuda e dialogo, pa asina por sali definitivamente di e conflicto aki.

Varios luna caba, Venezuela ta bibando den un crisis politico y economico profundo, cu ta trece mas escasez di cuminda y medicina, y un inflacion hopi halto.

Cerca di 150 persona a perde nan bida den cuatro luna di protesta, cu tabata purba di haya un salida democratico di Maduro.