(AP) – Ora investigador di mal informacion Weng-Ping Liu a investiga China su esfuersonan pa influencia Taiwan su eleccionnan recien usando cuentanan di rednan social falso, algo inusual a resalta entre e cuentanan mas exitoso.
Nan tabata hende muhe, of por lo menos, esey ta loke nan tabata aparenta di ta. Perfilnan falso cu tabata bisa di ta muhe a ricibi mas interaccion, mas bista y mas influencia compara cu cuentanan cu tabata homber. “Perfil falso di hende muhe ta haya mas credibilidad,” Liu a bisa, ken ta un investigado di Taiwan su Ministerio di Husticia.
Sea cu ta companianan di propaganda Ruso of Chines, chatbot di AI of estafadornan online, bo ta mira mas exito si bo ta hende muhe, comprobando cu mientras tecnologia por crece mas y bira cada biaha mas sofistica, e cerebro di ser humano ta keda sorprendemente facil pa hack parcialmente a causa di stereotiponan cu a migra for di mundo real na esun virtual.
Hende tin hopi tempo ta asigna caracteristicanan di ser humano manera genero na obhetonan. Esaki ta duna sentido cu e caracteristicanan aki lo crea un perfil di red social falso of ta haci e chatbotnan mas atractivo. Sinembargo, preguntanan tocante con e tecnologianan aki por refleha y aplica stereotiponan di genero ta ricibiendo atencion mientras mas assistent di bos y chatbot di AI ta drenta e mercado, haciendo menos obvio e linea entre hende y mashin.
“Bo kier inyecta emocion y calor y un manera hopi facil pa haci esaki ta di scoge un muhe su cara y bo,” Sylvie Borau, un profesor di marketing y investigador online di Toulouse, Francia, ken su trabao a mira cu usuarionan ta prefera ‘botnan’ di hende muhe y ta mira nan mas como ser humano compara cu e versionnan “masculino.”
Hende tin e custumber di mira hende muhe como mas caluroso, menos menasante y mas dispuesto cu hende homber, Borau a conta The Associated Press. Hende homber, sinembargo, ta hopi biaha percibi como pas competente, aunke ta mas probabel di ta menasante of hostil. A causa di esaki, consciente of inconscientemente, mas persona ta dispuesto di interactua cu cuentanan falso cu ta presenta como hende muhe.
Ora cu Sam Altman di OpenAI tabata buscando un bos nobo pa programa di ChatGPT di AI, el a acerca Scarlett Johansson, el a bisa cu Altman a conte cu e usuarionan lo haya su bos, cual tabata e bos di e assistent den e pelicula “Her”, “confortabel.” Johansson a rechasa Altman su peticion y a menasa di demanda ora cu e compania a haci uso di un version cu tabata “sumamente similar” na su bos. OpenAI a pone e bos nobo den pausa.
Potretnan di perfil femenino, particularmente cu hende muhe den vestuario poco cubri ta un otro manera di atrae hende homber online.
Usuarionan tambe ta trata botnan di manera diferente basa riba nan sexo persibi: Borau su investigacion a haya cu chatbotnan “femenino” ta hopi mas probabel di ricibi acoso sexual y menasa compara cu botnan “masculino.”
Perfilnan di hende muhe riba rednan social en averahe ta ricibi mas di 3 biaha e bistanan compara cu esun di hende homber, segun un analisis di mas di 40,000 perfil conduci pa AP di Cyabra, un agencia di tecnologia Israeli cu ta specialisa den deteccion di bot. Perfilnan di hende muhe hopi biaha ta pretende di ta mas hoben pa ricibi mas bista segun Cyabra.
“Crea un cuenta falso y presenta esaki como un hende muhe ta haci cu e cuenta ta ricibi mas audiencia compara cu presenta esaki como hende homber,” segun Cyabra su rapport.
E campana di influencia online crea pa nacionnan manera China y Rusia tin hopi tempo ta usa cuentanan di hende muhe pa plama propaganda y mal informacion. E campananan hopi biaha ta explota hende su bista di hende muhe. Algun ta aparenta di ta hende sabio, welanan cu ta comparti sabiduria mientras otronan ta imita hende hoben cu ta atractivo y emociona pa papia tocante politica cu hende homber.
Luna pasa, investigadornan di e agencia NewsGuard a haya centenares di cuentanan falso, algun cu potretnan di perfil genera pa AI, a ser usa pa critica e president Joe Biden. El a tuma luga despues cu algun sostenedor di Trump a cuminsa publica potret personal anunciando cu nan “no lo vota pa Joe Biden.”
Mientras varios di e publicacionnan ta autentico, mas di 700 a bini for di cuentanan falso. Mayoria di e perfilnan a bisa di ta hende muhe hoben bibando na estadonan di Illinois of Florida, un di nomber PatriotGal480. Sinembargo varios cuenta a usa lenguahe practicamente identico y potretnan di perfil cu a ser genera pa AI of horta for di otro usuarionan. Y mientras nan no por a bisa sigur ken ta operando e cuentanan falso, nan a haya decenas cu conexion na nacionnan incluyendo Rusia y China.
X a kita e cuentanan despues cu NewsGuard a contacta e plataforma.
