(AP) – Autoridadnan na Merca a haci preguntanan na e CEO di TikTok Shou Zi Chew tocante siguridad di data y contenido dañino, cu algun pushando pa prohibi e aplicacion den henter e nacion.
Chew, ken ta di Singapore, a contesta e autoridadnan bisando cu TikTok ta pone prioridad riba e siguridad di usuario mientras e tabata purba evita un prohibicion pa medio di aclaria su relacion of lasonan na China. Ambos representantenan republicano y democratico a cuestiona di manera agresivo riba topiconan incluyendo TikTok su practicanan di moderacion di contenido, su plannan di siguridad pa cu data y su pasado den spionahe riba reporteronan.
Dicon Washington ta bisa cu TikTok ta un menasa?
TikTok, cual tin mas di 150 miyon usuario Mericano, ta completamente un subsidiario di agencia di tecnologia Chino ByteDance Ltd., cual ta scoge su ehecutivonan.
ByteDance ta basa na Beijing sinembargo ta registra na Islanan Cayman, manera ta comun pa companianan priva cu ta propiedad di China. Su base di operacion ta na Beijing su districto Haidian, cas di universidadnan clave y un centro pa agencianan y companianan di tecnologia. TikTok tin basenan di operacion dual na Singapore y Los Angeles.
Gobiernonan di e parti west di mundo ta preocupa cu autoridadnan Chino por forsa ByteDance otorga data di TikTok di usuarionan Mericano, exponiendo informacion sensitivo. Ministerio relaciona cu asuntonan den exterior su vocero Mao Ning a bisa diabierna cu China su gobierno nunca a y no ta pidi companianan pa “colecta of provee data, informacion of inteligencia” cu ta warda den paisnan den exterior, agregando cu “Merca no a provee evidencia te cu awo pa comproba cu TikTok ta menasa e siguridad nacional di e pais.”
ByteDance ta bisa cu 60 porciento di e compania ta pertenece na inversionistanan cu no ta Chino manera agencianan di inversion Mericano Carlyle Group, Kohlberg Kravis Roberts y Hapon su SoftBank Group. Empleadonan tin 20 porciento y su fundadornan tin e 20 porciento restante.
Reglanan Chino cu ta preocupa e gobiernonan
China su National Intelligence Law di aña 2017 ta bisa cu “cualkier organisacion” mester asisti of coopera cu inteligencia di estabo mientras un Counter-Espionage Law (ley contra spionahe) di aña 2014 ta bisa cu “organisacionnan relevante…. no mag di nenga” pa colecta evidencia cu ta necesario pa un investigacion.
Mirando cu ByteDance ta un compania Chino y ta doño di TikTok, tin un probabilidad halto cu nan lo mester cumpli cu e reglanan aki si e autoridadnan Chino pidi pa otorga e data na nan. Leynan y regulacionnan ta solamente un parti di e aspecto di e partido comunista su control. No tin limite legal na e partido su poder. Autoridadnan tambe por menasa di cancela licencia, conduci investigacionnan di impuesto of regulatorio y haci uso di otro penalidadnan pa obliga cumplimento di companianan Chino y stranhero operando na China.
E gobierno tambe a busca manera di tin control mas directo riba e companianan pa medio di adkiri asiento den e huntanan di director.
TikTok mester otorga data si gobierno Chino pidi pa esaki?
TikTok a priminti cu lo proteha e data di usuarionan Mericano pa medio di warda esaki riba server opera pa contratista di fuera, ORacle Corp., den loke ta conoci como “Project Texas.” Chew, e CEO di TikTok, a bisa cu tur data di usuarionan Mericano ta warda na Merca y e compania pronto lo ta cla cu e proceso di delete tur data di Merca for di cualkier server cu no ta Oracle e aña aki.
E miedo ta cu ByteDance lo mester otorga e informacion cu nan obtene via TikTok si nan ricibi ordo pa haci esaki di gobierno Chino, sinembargo Chew a bisa cu Project Texas lo pone data di Merca fuera di alcance di China.
E partido Comunista tin influencia riba ByteDance?
Durante e reunion diahuebs, a cuestiona Chew fuertemente purbando di saca informacion si ByteDance tabatin relacion na e autoridad comunista na China.
E no a revela hopi pa cu e topico aki, contestando cu e “sa cu e fundador mes no ta miembro di e Partido Comunista, sinembargo nos no conoce e afiliacion politico di nos empleadonan pa motibo cu esaki no ta algo cu nos ta puntra,” Chew a contesta.
A alega cu e gobierno Chino tin un “golden share” den ByteDance cu ta permiti nan controla un asiento den ByteDance su hunta di director, Chew a aclaria cu esaki “no ta corecto.” Na China ‘golden share’ ta fondonan di inversion oficial cu ta un manera pa Beijing haya mas control riba un negoshi pa medio di ricibi 1% di e compania.
Chew a splica cu e “Partido Comunista no tin derechonan di vota den ByteDance.” ByteDance su subsidiario principal na China ta esun cu tin e licencia pa algun di su videonan y plataforma di informacion den solamente e mercado Chino.
Con China a reacciona na e testimonio di e CEO?
Mayoria di e reaccion riba rednan social na China tabata expresa simpatia na Chew, cu elogio pa con el a lidia cu e preguntanan hostil dirigi na su persona.
Comentarionan riba Douyin, e aplicacion similar na TikTok pero exclusivamente pa China, y e plataforma Weibo, tabata critico di e autoridadnan Mericano pa motibo cu a haci preguntanan “di trampa”. Varios a laga comentario usando un dicho Chino cu ta nifica “si bo kier acusa un hende, semper bo ta haya un manera.”
