(CiberCuba) – E regimen Cubano, di signo profundamente patriarcal, ta keda evita e uso di e palabra “feminicidio” ora di papia di e crimennan cu hombernan machista ta comete contra hende muhe.

Scondi tras di argumentonan di un solo banda y politikeria barata, e totalitarismo comunista cu ta reina na Cuba ta evita di papia di e violencia di genero cu e terminologia usa y acepta internacionalmente pa tur e paisnan cu ta reconoce su existencia y cu ta combati e problema aki.

Sinembargo, La Habana, cu ta presumi su Codigo de las Familias manera esun mas avansa na mundo ta exhibi di un manera robusto un supuesto normalisacion di e identidadnan di genero, a traves di conferencianan dicta pa Mariela Castro Espin, yiu di e dictador Raul Castro, no ta acepta pa papia di feminicidionan na Cuba.

“Plataformanan subversivo anti Cubano ta purba di impone cu na Cuba ta existi feminicidio, termino cu ta indica supuesto inaccion estatal dilanti hechonan violento pa motibo di genero. Nos por sigura cu esaki ta un construccion mediatico cu ta completamente contrario na e realidad Cubano,” Miguel Diaz-Canel a afirma diabierna.

Den su discurso di clausura di e Congreso di e Federacion di Muhenan Cubano (FMC), e tambe prome secretario di e Partido Comunista de Cuba (PPC) a probecha pa defende e medidanan adopta pa su gobierno pa aborda e “asesinatonan di hende muhe” cual e ta resisti di cualifica manera “feminicidio”

E hustificacion pa no haci esaki, segun Diaz-Canel, ta cu no ta existi “inaccion estatal” pa cu e crimennan aki. E ta pretende di cubri e naturalesa profundamente patriarcal y machista cu ta biba den e sociedad Cubano, y specialmente, den e machismo imaginario desaroya pa e propaganda di e asina yama “revolucion” y e indoctrinacion di PCC.

“No por tin impunidad na Cuba, mucho menos ora ta trata e delitonan motiva pa cualkier tipo di discriminacion y primordialmente contra hende muhe. E normanan huridico cu mi a menciona anteriormente tin aparta hopi preciso loke ta tipifica manera delito e diferente figuranan cu por reduci e integridad fisico, psicologico y moral di hende muhe,” e gobernante a defende, na mesun momento cu e ta reconoce cu Cuba a triplica aña pasa e cifra di personanan condena pa asesinatonan machista den e registro di 2022.

E tribunalnan Cubano a procesa den 2023 61 suheto autor di asesinato di hende muhe. Segun Diaz-Canel, den e 93% di e casonan, e sancionnan ta surpasa e 20 aña di prizon, mientras cu cinco caso a merece cadena perpetua. “Nan ta solamente un par di datosnan cu ta ilustra e tolerancia cero di e Estado Cubano pa cu e tipo di conducta aki,” el a subraya.