E actual prome vice-presidente di Cuba, Miguel Diaz-Canel, di 57 aña, a keda proponi ayera pa Asamblea Nacional di Poder Popular di e isla, pa ocupa e presidencia di e Conseho di Estado, den substitucion di Raul Castro, di 86 aña, cu ta bandona e cargo despues di dos mandato consecutivo.
Díaz-Canel ta encabesa e proposicion di e Comision di Candidatura Nacional (CCN) pa confirmacion di e organo mas halto di gobierno di e pais, e Conseho di Estado, un candidatura cu lo ser someti na votacion di e recien constitui Asamblea, aunke e resultado no lo a bira publico te awe diahuebs. E 605 diputadonan di e asamblea a dedica un aplauso prolonga na esun cu te awor tabata e‘number dos’ di e gobierno Cubano.
Como prome vice-presidente di e Conseho di Estado, CCN a propone e dirigente veterano Salvador Valdes Mesa, di casi 73 aña, miembro di e Buro Politico di Partido Comunista di Cuba (PCC), unico partido permiti, y cu te awor tabata ocupa un di e cinco vice-presidentenan di e organismo.
Dos di e cinco vice-presidentenan di e Conseho di Estado lo keda: Ramiro Valdes, un figura historico di e Revolucion, y Gladys Bejerano, mientras cu Roberto Morales, Ines Maria Chapman y Beatriz Johnson Urrutia ta e vice-presidentenan nobo.
Ta prome biaha cu ni Raul Castro (86 aña), ni e vice-presidente Jose Ramon Machado Ventura (87), otro miembro di e generacion cu a crea e Revolucion, ta den e poderoso organo estatal aki, den cual e unico ‘historico’ cu a keda, contra tur pronostico, ta e comandante Ramiro Valdes, di 85 aña.
Como secretario a nomina pa reeleccion Homero Acosta, tambe miembro di e Comite Central di PCC. Di e 23 restante miembronan di e Conseho, 13 ta cara nobo y 10 ta keda, entre nan mando militar influyente manera Leopoldo Cintra Frias, ministro di Forsanan Arma (FAR),y di mundo di cultura, Miguel Barnet, presidente di e Union di Escritor y Artista di Cuba (UNEAC).
Ta keda tambe e canciyer Bruno Rodriguez, e hoben dirigente Susely Morfa, y e lider di e Central di Trahado di Cuba (CTC), Ulises Guilarte, tur di generacionnan mas hoben y yama pa puesto di relevancia durante e mandato di Raul Castro.
(fuente: Cubanet/EFE)
