Diasabra 22 di april tabata Dia Internacional di Mama Tera, na unda minister di Naturalesa Ursell Arends, hunto cu varios stakeholders local y internacional, a bin hunto na Aruba Earth Day Forum 2023 pa dialoga encuanto e importancia di Derecho di Naturalesa.
Nan a menciona cu algun di e expertonan presente tabata Global Alliance for the Rights of Nature, Earth Law Center, The Leatherback Project y Directie Natuur en Milieu.
“Aruba ta compromete pa restaura e relacion entre ser humano y naturalesa, iniciando e proceso legislativo pa agrega Derecho di Naturalesa den constitucion di Aruba”, e comunicado ta sigura.
Derecho di Naturalesa ta reconoce cu medio ambiente tin balor inherente y mester haya respet en bes di solamente un recurso pa haci uso di dje. Derecho di Naturalesa ta representa un cambio di mentalidad den con ta mira medio ambiente, pa restaura e balansa entre ser humano y naturalesa, por minimalisa explotacion y crea un futuro sostenibel pa tur.
“Mi ta gradici tur esnan cu a traha duro pa proteha nos ambiente,” Minister di Naturalesa di Aruba Sr. Ursell Arends a bisa. “Hunto, nos por restaura e balansa entre ser humano y naturalesa y cuido di loke ta nos di nos. Nos no ta duna derecho na naturalesa. Naturalesa tin derecho. Esaki ta un prome paso pa reconoce esaki.”
Dia 21 di april a entrega na Departamento Legislativo e proyecto di ley pa introduci Derecho di Naturalesa den constitucion e atardi prome cu Dia di Mama Tera: “e esfuerso pionero di Aruba pa introduci Derecho di Naturalesa lo sirbi como ehempel pa otro paisnan sigui,” a señala.
Tambe, minister Arends a sigura cu su Bureau a traha riba un concepto di ley pa asina hancra Derecho di Naturalesa den constitucion. Tabata dia 22 di april aña pasa cu minister Arends a informa su intencion pa esaki y un aña despues a entrega e proyecto di ley na Departamento Legislativo pa cuminsa cu e proceso pa e cual Parlamento tambe a haya un presentacion di expertonan local como tambe internacional cu a elabora riba e importancia di proteccion concreto pa medio ambiente, como por ehemplo, Directie Natuur en Milieu y Rep Law, como tambe expertonan internacional di Earth Law Center y Global Alliance for the Rights of Nature cu tambe tabata presente.
