E iniciativa di Agroforestria Sintropico, cu tin como meta pa educa e siguiente generacion riba e balornan di agricultura Sostenibel y promove seguridad alimentario, ta bay cuminsa na e scolnan cu a keda scogi.
E proyecto aki a keda anuncia dia 16 di october ultimo durante Dia di Alimentacion, pa minister di Sector Primario, Ursell Arends conhuntamente cu Living Soil Aruba, pa entre otro, promove interes di sector primario na e muchanan cu ta bay haya oportunidad educativo pa siña tocante agricultura sostenibel, usando tecnicanan di Agro Forestry pa mehora e calidad di suelo y mas cu tur cos, elimina e uso di pesticida.
Ademas, e proyecto ta aporta na seguridad di alimentacion y autosuficiencia cu un enfoke riba scolnan cu kisas por tin limitacion pa por yega na e tipo di proyectonan aki, kisas pa limitacion financiero.
Pa esaki, scolnan a cuminsa registra for di november caba, unda directivanan di scol lo mester a haya carta cu tur splicacion pa asina nan por haya tur detaye relaciona cu e proyecto aki.
Minister Arends a informa cu ta bay scoge 10 scol pa participa den e proyecto a base di algun criterio specifico, manera motivacion di scol, tereno disponibel cu awa y coriente y tambe e compromiso di scolnan pa participa den e proyecto cu ta cuminsa awor.
Rose Barros di Living Soil Aruba a expresa cu e proyecto aki ya caba a cuminsa na Prinses Amalia Bassischool y door di esey a haya inspiracion pa haci pa Agroforestry na otro scolnan, unda muchanan di cada klas ta traha den cunucu, cortando yerba moombasa, ta cosecha papaya, yuca y berehein.
Tur scol basico por a participa den esaki y manera minister Arends a expresa, nan lo sigui amplia. Awor e ta un proyecto piloto y ta rekeri boluntario, loke ta nifica cu mayornan tambe mester participa pa asina conhuntamente por mantene e plantacion den scol.
Tin algun scol cu tin e proyecto cu Santa Rosa a implementa y segun minister Arends a expresa, esey ta un otro manera di plantacion, cu tin e titulo “Ban planta awa,” loke ta crea iniciativa y interes pa cuminsa planta diferente.
“Ministerio di Naturalesa ta trahando conhuntamente cu Santa Rosa y tambe cu Living Soil Aruba pa asina ey duna guia na scolnan con nos por yega na sostene y tambe brinda e materialnan necesario pa e planificacion, plantacion di e matanan y tambe con pa anda cu e tereno mes tambe, ademas personal di scol y tambe boluntarionan lo ricibi training tocante tecnicanan di Agro Forestry, mantencion y cuido di plantacion di mata y tambe e integracion di esaki den e curiculo escolar, tur e partners cu ta participa por garantisa un ehecucion exitoso di e proyecto aki,” minister Arends a sigura.
Pa personanan interesa di registra pa ta boluntario riba un di e dianan y yuda crea un plantacion di mata riba tereno di e scolnan cu a ser scogi, mester bay bishita Facebook page di Minister Ursell Arends.
