Observa riba 8 di maart, Dia Internacional di Hende Muher ta ser celebra anualmente pa reconoce logronan di hende muher, conscientisa tocante igualdad di genero, y promove empoderamento di hende muher. Dia Internacional di Hende Muher ta provee un plataforma pa papia tocante e logronan social, economico, cultural y politico di hende muher y campañanan pa sostene nan derechonan.
Tur aña e organisacion UN Women (United Nations Women) ta scoge un tema specifico pa e celebracion di Dia Internacional di Hende Muher y e aña aki e tema ta bira, “Acelera Accion.”
E caminda pa yega na e celebracion di Dia Internacional di Hende Muher tabata uno largo, y ta uno cu ainda falta hopi pa cana, pero avancenan esencial a ser logra den transcurso di añanan. Puntonan di cambio importante den e historia di Dia Internacional di Hende Muher ta inclui e proposicion di Clara Zetkin di 1910 pa un Dia Internacional di Hende Muher, e prome Dia Nacional di Hende Muher na Merca na 1909, e marcha di 1908 di 15 mil hende muher na e ciudad di New York buscando miho derechonan, y e prome conmemoracion di e fiesta den varios nacion na 1911.
E welga di hende muher Ruso di 1917 a marca 8 di maart como e fecha pa e Dia Internacional di Hende Muher.
Como resultado, e Asamblea General di Nacionnan Uni a cuminsa conmemora Dia Internacional di Hende Muher na 1975 y e dia despues Dia Internacional di Hende Muher a ser reconoci formalmente pa Nacionnan Uni.
Dia Internacional di Hende Muher ta sirbi como un plataforma importante pa activismo, treciendo atencion na desigualdadnan di genero duradero y alsando voznan na fabor di igualdad. E ta fungi como un yamada pa accion, recordando e trabao cu tin ainda pa haci pa realisa derechonan di hende muher completamente y promove medidanan pa atende problemanan manera desigualdad economico, subrepresentacion politico y violencia basa riba genero.
A pesar di avancenan grandi, ainda tin obstaculonan grandi cu ta para den caminda pa derechonan di hende muher ser realisa completamente mundialmente. Sinembargo, Dia Internacional di Hende Muher ta un ocasion significante pa evalua logronan, reconoce obstaculonan, y renoba compromiso pa tuma pasonan importante pa un futuro igual di genero.
Na Aruba Dia Internacional di Hende Muher ta un celebracion pa alsa tur e sernan femenino cu ta contribui di un manera of otro na desaroyo y bienestar di e comunidad general di Aruba. Hendenan prominente den comunidad ta ehempel bibo cu determinacion y perseverancia ta clave pa logra cualkier meta den bida.
Nos ta aplaudi y reconoce e hendenan muher cu a y ta sigui habri caminda pa tur otor hende muher na Aruba.
Tisa LaSorte, CEO Aruba Hotel & Tourism Association: “Den mi carera mi a experiencia chauvinismo na diferente ocasion, pero mi perspectiva ta cu esey no mester ta obstaculo pa hende muher. Loke ta conta den trabao ta esfuerso y resultado. Mantene confiansa den bo mes y usa bo talento, bo voz, y bo determinacion pa crea resultado positivo, pa keda productivo, y logra metanan. Esey ta conta mescos pa homber y muher.”
Liliana Rasmijn, prome vocero femenino di KPA: “Como mama y polis mi ta bisti dospechi. Riba Dia Internacional di Hende Muher, mi ta sinta y reflexiona riba e parti unico pa loke ta balans di ser mama y tambe polis. Pa ta ser un hende muher den e ramo domina pa hende homber ta significa enfrenta diferente obstaculonan pero alabes ta significa mustra mi yiunan kico ta ser fuerte, resiliente y dedica na sirbi otro. No tabata facil pa ta mama y haciendo mi trabao como polis. Pero mi ta haci’e cu orguyo, sabiendo cu mi ta aporta na mi pais. Pa e ser femenino y e hobennan corda cu no semper lo ta facil pa logra bo metanan, bo lo haya obstaculonan pero semper cara na laira y kere den bo mes cu bo ta logra. Seca bo lagrimanan y pone bo miho sonrisa y sigui focus pa bo metanan. Dia Internacional di Hende Muher ta dia pa celebra cada hende muher cu ta duna tur di su banda, den su trabao y na su cas. Nos ta sigui mustra cu nos ta fuerte a pesar, pero semper cu curason humilde.”
Evelyn Wever-Croes, prome minister president femenino di Aruba:“P’ami e Dia Internacional di Hende Muher ta un dia di reflexion, di compromiso y di celebracion.
Un dia di reflexion riba e papel importante cu hende muhernan ta desplegando na Aruba. Como hende muher nos ta trece otro cualidadnan na mesa. Nos ta usualmente mas empatico, nos ta dirigi nos mes mas na busca solucion, y mayoria di nos no ta permiti ‘ego’ hunga un rol. Mi ta convenci cu si nos tabata tin mas lidernan femenino, lo tin menos guera na mundo.”
“New York Times a publica un articulo na november 2018 titula‘Aruba: where women lead’. Den un entrevista cu New York Times, mi a trece padilanti cu liderazgo femenino ta sigur un di e factornan cu ta determina e exito di Aruba. Na Aruba tin relativamente hopi lider femenino ta dirigi diferente organisacionnan y institutonan.”
“Pero nos sa tambe, cu no ta tur hende muher ta haya oportunidad of trato igual na hende homber. P’esey dia 8 di maart ta un dia importante pa nos reconfirma nos compromiso pa percura cu hende muher y mucha muhernan haya trato igual, y oportunidadnan igual.”
“Apart di esaki, dia 8 di maart mester ta un dia tambe di celebracion. Un dia pa celebra nos exitonan como hende muher. Y aki na Aruba tin hopi ehempel di exitonan cu nos por ta hopi orguyoso di nan.”
“Un cos si, tur e avancenan aki, no a bin di mes, y nos no mester lag’e na casualidad y kere cu hende muhernan den futuro lo tin tur e oportunidadnan di mes. Si nos kier pa nos yiu muhernan, nan yiu muhernan y tur mucha muhernan tin oportunidadnan real den liderazgo den nos pais, nos mester tuma pasonan consciente di awor caba, pa prepara e siguiente generacion.”
“Mi ta convenci cu pa un mihor Aruba, nos mester mas lidernan femenino. Mi ta sumamente orguyoso di por tabata e prome hende muher den ocupa e posicion di Minister President, y mi lo percura pa mi no ta e ultimo.”
