Diaranson awor parlamento lo trata e ley di presupuesto complementario 2017. Lider di fraccion di MEP, Rocco Tjon a referi cu tanto di CAft como di RvA (Raad van Advies) ta conseha gobierno actual pa formula un maneho pa realisa un financia sostenibel.
El a trece dilanti cu diferente biaha gobierno anterior a papia di situacion financiero sostenibel y responsabel. Sinembargo e parlamentario aki ta puntra su mes cu si esaki tabata e caso dicon CAft y RvA ta urgi e gabinete actual pa bin cu un maneho cu di berdad nan por papia di un maneho financiero sostenibel.
E cifra ta di alrededor di 130 miyon florin cu nan mester debati riba dje den e tratamento di e presupuesto complementario pa 2017. Aunke e ta haya cu tin algun pregunta riba dicon apenas un par di luna pasa gobierno anterior tabata cumpliendo cu e norma di CAft, y awor ta resulta cu e no ta logra alcansa di cumpli cu ne
Parlamentario Rocco a bisa cu durante e tratamento di e ley aki, un di e preguntanan cu nan tin ta relaciona cu e tarea di supervision cu CAft ta bin realisa durante e ultimo tempo. Ya cu pa nan no ta make sense den un cierto manera caminda e cifranan ta papia para cla, y awor CAft mes ta afirma loke a wordo pronostica e tempo ey no tabata real. “Dicon alarma no a wordo bati mas tempran y nan ta permiti esaki.”
Contractonan
El a bisa cu iregularidad a wordo presenta cu contractonan cu suma astronomico cu a wordo cera te hasta despues di eleccion. E ta remarca cu hasta e personanan cu a wordo contract ni sikiera ta presenta na trabou, y nan tin lunanan na servicio di gobierno. Nan ta salarionan di 10 mil, 15 mil y 25 florin. E hendenan aki mester a traha un documento di conseho pa ministernan anterior.
Nan ta salario segun parlamentario Rocco cu un vigencia te cu aña 2020. Sinembargo ora e minister nobo ta puntra nan pa e rapport di conseho, te ainda e no por bin riba mesa. P’esey parlamentario Rocco ta papia di un ‘maneho iresponsabel y no serio’ di e gobierno anterior. Te hasta e ta haya cu e tabata un maneho manipula cu cifra y manipula nos pueblo .
El a agrega cu no ta por nada cu e rapport di CAft y RvA ta remarca cu ta net den e di tres kwartaal di 2017 tur e gastonan di gobierno a cuminsa aumenta drasticamente.
Transparencia
Parlamentario Edgar Vrolijk (MEP) tambe a referi na e presupuesto complementario 2017 y riba loke institucionnan manera CAft y RvA a menciona. El a bisa cu den nan rapport ya caba di adelanta tabata bisto cu e presupuesto di e aña aki no ta yega na e normanan di e instituto di supervision CAft di 0.5% cu ta ekivalente na 25 miyon florin di deficit. E panorama ta bira mas preocupante considerando cu entradanan cu mester drenta den caha di gobierno, entre nan esun di Citgo, no a drenta ainda. Ya caba el a anuncia cu fraccion di MEP lo tin hopi pregunta durante e tratamento di e presupuesto complementario, y tambe nan lo ta critico entre nan riba maneho di gobierno actual.
Nan lo kier sa con minister actual di Financia lo yega na un presupuesto balansa y sostenibel pa e añanan nos dilanti. E ta haya cu den cuadro di transparencia pueblo mester sa ‘si e maneho di MEP, POR y RED lo dirigi su mes di bin cu medida of lo bin cu otro espacio financiero’.
Parlamentario Endy Croes (MEP) a bisa cu e tratamento aki ta debi na ‘placa cu a wordo derocha y gasta bou e gobierno anterior’. Mientras cu gobierno di coalicion (MEP-POR-RED) cu a drenta un luna pasa, tin cu percura mediante ley, coregi e ‘deroche’ di placa aki.
