Diamars di otro siman, 12 di september na Corte di Apelacion ta bay cuminsa tuma luga e regiezitting proforma di apelacion di e diferente acusadonan involucra den e caso penal Avestruz for di 3:30pm.

Den esaki, ta trata di Pieter Susebeek, Oslin Sevinger (Benny) Edgar Werleman, Curt Harms, Ninosca Nuñez, Carlo Mansur y Maria Leoncita Arends.

Ministerio Publico a pidi como castigo cinco aña di prison pa Benny Sevinger pa corupcion, estafa, mal uso di funcion como minister y labamento di placa, ademas di esey tambe Ministerio Publico a pidi pa Sevinger no eherce un funcion publico mas den un periodo di dies aña pero, pero april ultimo hues a duna Sevinger un castigo di un aña di prison cu seis luna condicional y tambe a inhabilit’e pa eherce un funcion publico pa un periodo di cinco aña.

Pa Pieter Susebeek, Ministerio Publico a pidi cuatro aña di prison y el a haya un castigo di hues di dos aña y cu un aña condicional cu ta lo cual su abogado Illes a apela.

Pa Werleman, Mansur y Nuñez Ministerio Publico a pidi 2 aña di prison y 25.000 florin di multa na unda hues a duna nan e castigo di 2 aña di prison cu un aña condicional y tres aña di prueba cu e condicion cu nan no por haci peticion pa tereno erfpacht den periodo ey, Mansur su abogado Carlo a apela esaki igualmente cu Werleman y Nuñez cu nan abogado Oomen.

Pa Maria Leoncita Arends Ministerio Publico a pidi prison incondicional di tres aña y un multa di 25.000 florin, di esaki, el a haya como castigo 24 luna di prison cu 12 luna condicional, un tempo di prueba di 3 aña y un multa di 50.000 florin lo cual su abogado Canwood ta apela.

Pa Curt Harms fiscal a exigi 100 ora di trabou comunitario y 25.000 florin di multa, hues a declara Harms liber pa acusacion di labamento di placa y a duna na dje un condena di 80 ora di trabou comunitario y 15.000 florin di multa e cual apela den e caso aki cu su abogado Carlo.

Caso Avestruz a cuminsa cu un investigacion di Landsrecherche tocante delitonan di corupcion cu posiblemente tuma lugar relaciona cu entrega di tereno di gobierno entre 2009 y 2017.

Den caso Avestruz a investiga e posibel rol di ex-minister Benny Sevinger y tabata dirigi riba e pregunta si companianan a haya derecho di erfpacht a base incorecto.

Oficialmente e caso a cuminsa na luna di september di 2022, pa varios dia e diferente sospechosonan a acudi na corte pa interogacion tocante e fundacion Curason Berde. Un di e tres acusadonan a nenga di contesta e preguntanan di hues na comienso di e caso, ya cu segun el a indica, el a wordo interoga varios biaha como testigo y el a contesta casi 3.000 pregunta. P’esey el a sigura cu no tabatin necesidad pa contesta ningun di e preguntanan, lagando esey na su abogado.

Ademas, abogado Vito Carlo, defensor di un di e acusadonan, a expresa cu door cu e caso ta basta complica, su cliente a busca un specialista riba e ramo pa cual e ta sospechoso, y Hof na dos ocasion a nenga esey, pa motibo cu solamente abogadonan cu ta registra na Hof na Corsou of Aruba por bringa leynan dilanti Corte den e region. Si ta bin un abogado Hulandes, e mester pidi permiso na Hof pa e por para banda di e abogadonan local. Segun Carlo a menciona, Hof a bis’e cu e caso no ta complica y cu e mes por haci’e unda el a pidi un formalidad pa laga abogado prepara tur cos, esey ta su area, pero esey no a wordo honra.

Cu tur e sospecho a surgi varios sub-caso:

Elenath y Deshaun, tratando e transaccionnan di tereno reparti na varios luga rond di e isla, y con a usa medionan ilegal pa cierto persona por a adkiri un di e terenonan aki a cambio di algun beneficio; y Damira y Bucuti, tratando labamento di placa y malversacion di fondo.

Fin di aña pasa, tur sospechoso a duna nan declaracion y a presenta pa trata e aspectonan personal.

Asina e acusadonan a haya nan veredicto di hues di Corte di Prome Instancia dia 14 di april ultimo,sinembargo, e caso aki ta apenas un link den un cadena di corupcion afectando politica di Aruba.

Ademas di Sevinger tin e condena di ex-minister Paul Croes, e acusacionnan involucrando Eddie Briessen, e caso contra ex-minister Guillfred Besaril, e condena contra Alan Howell – ken ainda a apela su sentencia. Tambe tabatin acusacionnan contra parlamentario Marisol Lopez Tromp y e caso Kukwisa cu despues na april ultimo nan a seponeer e caso aki. Esakinan ta apenas algun di e acusacionnan cu a sali na luz relaciona cu corupcion den politica di Aruba.

E pregunta ta keda, ken ta bay ta e siguiente den e lista di politico cera?

Den un editorial cu Bon Dia Aruba a publica dia 17 di april ultimo ta señala cu: Apelacion den e caso penal aki lo core su ruta durante e proximo dos aña sigur, y lo hiba nos cerca di eleccion na 2025, si no sucede nada otro cu por causa eleccion mas tempran. Independiente di e resultado di e siguiente caso(nan), e lo no ta un punto positivo pa campaña cu credibilidad, dunando un bentaha grandi na e otro partidonan, cu cada biaha por mustra riba e hecho cu e partido no tin ningun intencion di haci un ‘restart’ moral.

Y pa corona obra, e persona en cuestion mes lo keda den parlamento, te dia cu tin un condena ireversible. Ya cu e mes ta tuma como punto di salida cu e por keda completamente liber di tur acusacion, e lo no ria y su partido tampoco. E proximo añanan, e circo bergonzoso den parlamento lo no cambia, y Aruba ta keda hinca cu e berguenza cu no a percura pa ley, manera un pais drechi, cu ta impedi politico keda sinta den parlamento te dia pasa busca nan pa bay KIA.

Importante ta pa destaca cu diamars 12 di september di e caso aki na corte di Apelacion ta cuminsa, tambe ta e apertura di aña parlamentario na Parlamento di Aruba pues, no ta conoci si e parlamentario Sevinger ken ta acusa den e caso aki, ta bay ta presente den parlamento y despues bay Corte of no lo presenta na corte mes debi cu ta trata di un regiezitting proforma, algo cu tambe lo por sucede cu e otro acusadonan.