Dialuna registracion pa trabao di construccion ta cuminsa: Cantidad di persona pa cada nivel ta uno matematico pa monitor Covid-19

Minister di Husticia, Andin Bikker a informa cu nivel 1 di reactivacion, cual el a keda encarga di dje hunto cu otro coleganan, entre nan esun encarga cu infrastructura, caminda nan a yega na un organo cu ta surpasa tur ministerio.

E fase aki ta permiti pa nos bay over na apertura gradual pa medio di nivelnan di dos siman cada un pa loke ta trata e reactivacion di construccion y mantencion di proyectonan di infrastructura. E nivel 1 di dos siman cu ta core for di 4 te cu 17 di mei proximo.

El a laga sa cu nan a percura pa ora cu nan ta reactiva economia pa loke ta trata e tematica di construccion y mantencion, nan kier sigura cu esun cu tin nan respectivo permisonan na ordo ta esunnan cu ta bin na remarca pa por participa den e desaroyo economico aki.

E mandatario a duna un par di detaye relaciona cu e circunstancia nobo debi na e crisis di e coronavirus/Covid-19. El a anuncia cu tin cierto condicionnan pa loke ta e nivel 1. Un di nan ta cu solamente ta wordo permiti te cu 15 persona trahado, incluyendo personal. Tur compania cu kier reanuda nan trabaonan y persona natural cu ta construyendo su propio cas mester manda un solicitud di registracion via e-mail na: info@dow.aw

E mandatario a informa cu dialuna awor dia 4 di mei nan lo cuminsa cu registracion. Tambe tin un serie di rekisito pa bo por bin na remarca pa haya un aprobacion pa bo por continua cu e trabao di construccion cu nos ta comparti cu e articulo aki.

Bikker tabata reserva riba e posibilidad di bin cu un excepcion pa permiti mas cu 15 hende por traha den proyecto di construccion grandi, unda no lo tin aglomeracion di hende y tambe ta duna mas opcion pa mas hende por traha. Contestando Bon Dia Aruba su pregunta riba e topico aki, el a bisa cu nan a haci un evaluacion den e crisis team pa gradualmente por reactiva nos economia. P’esey nan a yega pa permiti 15 persona so den e prome nivel. E cantidad lo sigui aumenta consecuentemente durante e siguiente nivelnan. Ya cu e meta principal ta pa nos por contene cu e coronavirus por sigui plama.

Segun e mandatario, e cantidad di hende permiti den cada nivel ta algo cu matematicamente bo tin pa calcula, con bo por minimalisa e aspecto di controla y evita mas caso di contagio di Covid-19.

“P’esey nos a yega na e cifra aki. E no ta algo pa haci fastioso,” el a bisa. Sino cu e cifra aki ta algo cu matematicamente nan por hiba un control. P’esey nan a bin cu nivelnan pa sigui monitor con e casonan ta sigui desaroya na Aruba.