Manera Fundacion Anti Droga Aruba (FADA) ta haci tur aña, for dia 23 te cu 27 di october, nan ta celebrando e siman di bisti na locura, cu e aña aki tin como lema oficial “Be Kind to your Mind.”
Rubiella Toppenberg, ken ta fungi como trahado preventivo, a sigura cu e aña aki nan ta involucra salud mental hunto cu e meta oficial cu ta e prevencion di uso di droga y alcohol.
Aña pasa, nan a saca un lema ganado cu e aña aki nan a involucra den e lema oficial, cual a bira “Un conseho pa un amigo, Droga ta bo enemigo.” Mirando cu nan ta haya hopi importante e participacion di tur persona, igualmente cu aña pasa, e aña ki tambe nan ta bay scoge un lema ganado.
Pa habri e campaña, dialuna 23 di october e actividad ta consisti di bisti un T-shirt na cora loke ta nifica bisa “NO, na uso di droga, alcohol y duna inicio na Red Ribbon Week 2023.”
Pa diamars 24 di october, nan a involucra salud mental unda tur hende mester bisti cu meanan blauw.
Pa diaranson 25 di october ta pa bisti na berde y tambe pa parti premio na diferente categoria cu ta bay pinta e kleurplaat oficial, cu ya caba ta disponibel di manera digital via FADA nan website y rednan social. Ademas ta bay tin premio pa e lema ganado.
Pa diahuebs 26 di october e participantenan tin cu bisti un jersey di nan ekipo faborito pa mustra cu nan tambe ta sigui un bida saludabel. E idea ta pa muchanan bira mas creativo, unda cu tambe nan por pinta nan mesun T-shirt di nan ekipo preferi si nan ta desea.
Ultimo dia, diabierna 27 di october “Show us your peace and say cheese” unda cu por pone riba un T-shirt blanco un lema pa salud mental of contra adiccion.
Toppenberg a expresa cu esnan cu ta interesa di participa den actividad aki por bishita nan website www.fada.aw unda ta bay haya e banner cu ta bisa “Be Kind to your Mind” unda tin mas informacion.
Tambe el a bisa cu ta hopi importante pa muchanan for di chikito por cuminsa mira e importancia di dedica na salud mental y hunto cu esey preveni tambe e uso di droga y alcohol.
Hopi di e cambionan cu nan a haci pa e siman aki a bin na peticion di comunidad mes “nos a scucha y nos a purba di trece cosnan nobo durante e siman, tambe pa haci leuk pa e muchanan y esnan cu kier participa,” Toppenberg a finalisa.
