Nos ta hinca pa di tantisimo vez den un discusion cu tin su aspectonan interesante, pero cu na promer lugar mester a tuma lugar varios siman atras caba. Ta trata di e asunto di e Dialuna di Carnaval liber, si of no. Algun tempo atras caba e ministro encarga cu Labor a indica cu e no ta bay mishi cu e dia festivo aki, obviamente un expresion completamente na fabor di esnan cu ta trahador, cu ta e amplio mayoria.

Hopi laat den e proceso awor ta cuminza yega algun protesta contra esaki, di entre otro Camara di Comercio, cu ta haya cu no a tuma na cuenta interes di empresario, anto den e situacion di crisis unda mayoria di empresa tin nan problemanan pa sobrevivi. Si ta resulta cu e dia liber ta keda liber, esaki tin consecuencia grandi pa e companianan cu mester paga overtime, tur esey segun ley. Ta parce nos cu den e caso aki no tabatin un evaluacion balanza di interes di ambos banda. E evaluacion ey ta hustifica pasobra e asunto di dia di fiesta ta algo cu ta regla den nos ley principal di Labor, e asina yama Arbeidsverordening. Y e ta regla eyden pasobra e tin tur cos di haci cu trabao, y cu pago di trabao. Asunto di dia di fiesta no ta un asunto cultural, unda ta honra e dianan di fiesta religioso y nacional principal den un ley separa, sino cu e tin tur cos di haci cu areglo en vista di dia liber cu tin consecuencia pa trabao, pues pa trahador y pa empresario.

Esaki ta implica di mes caba cu e mandatario por a tuma un acercamento mas balanza pa e asunto, y no inmediatamente scoge pa e banda cu ta percura pa mas simpatia pa su decision, ya cu empleado semper ta hopi mas cu empresario. Si e haya e critica awor cu e ta tuma decision den pura cu miras pa eleccion, lo bira dificil pa desmenti esaki, ya cu su track record solido di populista ta traha na su desfabor. Tambe mester bisa cu no tabatin un aclaracion legal contundente, riba cual e mandatario lo a basa su decision. Cu esey pa hopi ta irelevante, pasobra di tur manera esnan pro o contra ta mantene nan opinion manera e ta toch, no ta kita cu normalmente un mandatario ta argumenta su posicion, tumando na cuenta e texto di ley, y e intencion su tras. Pues, kico e ley ta bisa?

Arbeidsverordening (AB 2013 no. 14) den articulo 22, inciso 1, bao di 2, ta duna como dia di fiesta o di conmemoracion: “de dag vallende na de grote carnavalsoptocht;” Nada mas, nada menos… Esaki ta duna oportunidad na ambos banda pa bringa nan caso, cu palabra naturalmente. Si un empresario ta argumenta cu e aña aki no tin Parada di Carnaval riba diadomingo venidero, y cu por lo tanto no tin motibo pa duna e dialuna siguiente liber, nan tin un argumento fuerte, pero e hecho ta keda cu e maximo responsable pa ehecucion di e ley a dicidi di interpreta esaki otro, aunke manera bisa caba, su argumento no ta conoci pasobra e no a bisa mas cu e no ta bay ta esun pa kita e dia liber ey. Cu esey, en todo caso a keda comproba cu e ministro no a duna debido consideracion na e punto di vista di e empresario y esnan cu ta representa nan, y esey ta duna oportunidad den corte.

Lamentablemente, e protesta di e defensor(nan) di empresario lo mester a bay corte hopi dia caba. No cu exito lo tabata garantisa, pero awor e fecha ta practicamente den porta caba y logra un veredicto ainda ta practicamente imposible. E asunto aki ta mustra un biaha mas cu principalmente e gremionan empresarial mester keda na alerta semper, pasobra e ministro aki tin custumber di tuma decision, y sin argumentacion drechi, pa loke ta parce e version cu lo percura pa mas simpatia pa e ministro mes. Esaki naturalmente den hopi caso no ta cuadra cu e decision mas sensato cu mester tuma, despues di a evalua tur interes den wega, pasobra manera bisa anteriormente, esaki ta un asunto laboral, por lo tanto un ‘afweging van belangen’ entre trahador y dunador di trabao. E caso di e prohibicion di retiro tabata e ehemplo cu si no ta bay huez, ta duna e ministro e caso gana, sin mas.

Ademas, e asunto aki por bay haya e siguiente capitulo, si por ehemplo mas den aña e crisis di Covid mengua y ta dicidi di tene un parada grandi di carnaval estilo ‘Zomercarnaval’. Esnan cu ta pro un dia liber ta bay pone presion riba e ministro pa ‘cumpli cu ley’ y duna otro dia liber, cu ta berdaderamente e ‘dia despues di e parada grandi di carnaval’ manera e ley ta bisa? Cu ki cara…? Aunke mester considera cu pa e tempo ey nos ta mas cerca di eleccion atrobe, pues di e mandatario aki por spera cualkier hustificacion pa cumpli cu esnan di ken e ta spera voto. Di otro banda, lo ta interesante pa haya sa di e sindicatonan kico nan ta pensa di e asunto aki. Nan lo ta apoya e ministro den esaki?