Durante un conferencia di prensa di DOW ayera mainta, a trece dilanti informacion tocante trabaonan di reconstruccion cu lo sigui tuma luga den area di Noord y Turibana.

Director di DOW Marlon Croes a splica cu dialuna di otro siman 04 di october durante un tempo di tres siman largo nan lo sigui haci trabaonan di reconstruccion na un pida di caminda di Noord y Turibana for di 7or di mainta te cu 7or di anochi.

Manera ta conoci, nan a cuminsa haci reparacionnan for di e rotonde di MFA Noord ta e crusada na unda Noord Medical Center ta keda y awor nan lo continua drecha e caminda for di e pida ey te Turibana.

E trabao aki ta bay sosode den tres pida na unda cu e dos prome a tuma luga manera Croes a sigura y awor nan ta cuminsa cu e fase tres cu ta T-weg Alvaresstraat te cu T-weg Tai Sheng Hardware Home Center/Aquazul Aruba Apartaments.

E fase cuatro ta cuminsa na T-weg Tai Sheng Hardware Home Center/Aquazul Aruba Apartaments Turibana 7 te cu Panaderia y Pasteleria del Campo.

E ultimo fase ta for di T-weg Turibana 7 y cu Panaderia y Pasteleria del Campo te cu Turibanan 21 y 17B panort di JR AutoCenter.

E trabao aki lo bay encera cu nan ta bay kita asfalt, drecha e fundeshi y asfalt’e back, nan ta bay pone un onderlaag prome pida pa pida, lo pone un toplaag prome di un solo tira pa asina no keda cu aansluiting riba dje y nan por haci’e e trabao mas miho posibel.

Esaki lo trece cune cu lo tin diferente cambio di ruta na unda cu riba fase tres cu nan lo bay pasa e trafico via e crusada dilanti Noord Medical Center unda cu chauffeurnan lo haya borchinan cu lo guia nan via na Altovista parcialmente y drenta back den Turibana sigui bay noord y esun cu ta bay zuid for di Westpunt por coy e caya di Semeleerstraat y usa Alvaresstraat pa subi na haltura di caminda di Noord Medical Center.

Nan lo tin un cambio chikito for di Panaderia y Pasteleria del Campo pa JR Autocenter na unda nan lo haci un desviacion y e chauffeur lo sali un tiki mas na nort pa evita cu nan lo cay den area di trabao.

Debi na esaki nan ta pidi pa comunidad tene na cuenta cu e desviacion di trafico y trabaonan cu lo cuminsa haci for di dialuna awor 4 di october pa asina nan lo sigui e guia di e borchinan.

Nan lo percura pa tin luznan y materialnan reflectivo pa tur persona por ripara cu caminda ta cera y asina garantisa e siguridad di trafico, ademas el a trece dilanti un punto na unda el a menciona cu no tur vivienda lo tin un acceso durante e construccion aki, ta p’esey cu den e fase aki number tres tin cinco cas na unda cu nan doñonan no por drenta na nan cas cu nan mesun auto.

Tocante esaki, Croes a sigura cu nan a papia cu e doñonan di Turibana Plaza caminda nan lo coopera cu e habitantenan por parkeer nan auto den Turibana Plaza y di eynan nan por cana te nan cas.

Tambe, Croes a declara cu e intencion ta cu den añanan dilanti nan lo sigui traha riba e caminda aki te cu Westpunt pa motibo cu e caminda aki a wordo drecha haci 25 of 30 aña pasa segun Croes a comenta y e ta yegando na un punto na unda cu mester drech’e back cu lo tuma luga den diferente fase manera nan tin den nan plannan y e medionan financiero.

Ademas di e area aki, Croes a trece dilanti cu tin hopi area cu nan ta distingui y ta p’esey cu nan ta haci un lista di prioridad di camindanan, usuarionan, cantidad di trafico, cuanto cas tin den dje loke ta defini cuanto prioridad tin y door di esey nan ta duna conseho na gobierno pa ki direccion nan ta bay, Noord Turibana tabata un area cu tabatin un prioridad bastante halto den ultimo añanan.

Trabaonan di crusada di Palm Beach lo cuminsa na aña 2022

Pa loke ta trata e crusada di Palm Beach cu den ultimo lunanan ta presenta basta accidente, Croes a menciona cu lo bira un rotonde y cu e documentonan ta cla y pronto nan lo cuminsa e trabaonan di destaho publico cu lo tin cu tuma luga, e trabaonan di e area aki lo cuminsa na aña 2022, si nan lo haci den aña aki nan lo presenta cu interupcion, por ehemplo temporada di vakantie y nan no kier esey.

“Pero e periodo trabaonan di awe pa e inicio di trabaonan di reconstruccion di e punta di e crusada di Palm Beach, nos lo bay haci cu medidanan preventivo pa nos por baha e velocidad di e autonan na unda tin e puntanan di conflicto entre e trafico”, Croes a afirma.

Den e caso aki tambe el a informa cu nan a sinta cu Cuerpo Policial pa analisa unda e mayoria di accidentenan a tuma luga, y esey a pasa unda cu e trafico ta bin for di Oranjestad cu e trafico cu ta crusa, esaki a trece cune cu otro siman den oranan di anochi nan ta bay cuminsa pone polis drumi pa asina ey habri e crusada di un manera responsabel unda cu e velocidad lo wordo baha completo, cu ora e persona cu ta sali for di banda por anticipa e distancia y velocidad cu e auto ta bini y aumenta e visibilidad di e trafico tanten nan lo cuminsa cu e trabaonan di reconstruccion di e crusada aki otro aña.