Ayera atardi a presenta na ATIA pa tur e brokernan e desaroyonan pa loke ta trata ‘Automated System for Customs Data’ (Asycuda) den e sistema di Aduana y e implementacion di Exit Note, cu ta e siguiente parti di e programa ey. Cu esaki, Departamento di Aduana ta cuminsa adapta pa e tempo di modernisacion.

Durante e charla, varios compania di broker a presenta pa nan por haya mas informacion di e programanan y asina haci algun pregunta. Roderick Croes, director di Departamento di Aduana a splica cu idea ta cu nan lo bay traha pa promove e economia di e isla y aduana ta un di organisacion cu ta zorg pa e productonan por ta mas lihe posibel riba mercado.

Croes a bisa den e charla cu e idea ta specialmente pa aeropuerto, na unda ta bay uza Ayscuda pa e turistanan y mester ta straight tambe ora cu mester por actua. E parti di container tambe tin e mesun idea y nan ta bay facilita e economia, esaki ta e siguiente innovacion di e programa Asycuda y Exit Note ,cu lo bay reemplasa algun documento cu nan ta uza na e momentonan aki. Cu e programanan aki, aduana no ta bay controla mas riba papel, sino cu un forma automatisa of digital.

Nan a cuminsa cu e proceso di innovacion di sistema desde aña 2014, ora cu nan a inicia cu Asycuda Aangifte Module y Manifest Module, na 2015 Tijdelijke Huisvesting Hoofdgebouw, 2016 VCP Pilot, CNI, Online betaling y Risk Manager, na 2017 cu Declaranten Cursus, 2018 Postbus Vrijmaking y 2019 Asycuda Exit Note cu lo reemplasa.

Na e momentonan aki, Croes a expresa cu nan ta haciendo hopi modernisacion di e procedura di aduana pa haci esey mas lihe, asina e comerciantenan por tin nan productonan mas lihe den nan negosh. E charla aki tabata dirigi pa tur e brokernan cu ta traha cu aduana y cu ta haci e trabou den e sector ey, como tambe representante di e negoshinan cu ta e importador di e productonan.

Den e charla, Croes a duna di conoce e cifranan di Controle Na Invoer. Tocante esaki, el a bisa cu e intencion di aduana ta pa controla mas despues di e declaracion y menos control na e momento di introduci e carga. Di mesun manera el a comenta cu nan a cuminsa cu e prome control administrativo cu 623.788,15 florin y di navordering ruim y tambe e boetnan wel ruim cu a yega te e cifra di 2.897.891,10 florin.

Di mesun manera, Croes a manifesta cu aduana tin su security management team, cu nan ta esunnan cu ta bay analisa tur e risiconan cu tin, tanto e parti fiscal como esun no fiscal y nan ta wak cua ta e productonan cu nan ta bay pasa, kico ta e control cu nan mester haci y asina nan ta bay controla mas.

Tocante e programa Exit Note, Croes a sigura cu lo bay drenta na vigor dialuna awor y aduana tambe lo bay haya nan tablet, cu cual nan ta bay haci nan control.

Tur e persona cu ta traha den e area aki a ricibi e training tocante e actualisacion di e sistema nobo y di mesun manera nan ta trahando riba un opleiding nobo, cu tur miembro di e team lo bay haya.

Pa finalisa, Croes a expresa cu mediante digitalisacionnan tin un miho bista y maske semper nan kier facilita e economia di Aruba den tur caminda, pero cu nan respective control.