Pa dialuna mas tarda lo por tin un contesta positivo riba desaroyo pero dia di habri e casino no tin. Esey no tin, y a compronde for di hotel si cu pa nan ta un urgencia, y ta un obligacion legal di e hotel, cu tin e licencia den su man, e permiso cu tin cu percura pa un casino ta habri, di acuerdo cu e ley, no por tene bo casino cera pasobra bo ta perde e licencia, segun Mediador di Gobierno, Anselmo Pontilius.
Ademas e hotel, den e caso aki Occidental Barcelo, tin un obligacion di duna servicio na su cliente cu a paga pa un camber di hotel, den cual tin un casino tambe pa duna servicio. Esey ta e parti y a kere cu riba su mes den e reunionnan cu a trata cu minister cu asociacion di casino, tin urgencia pa un biaha mas atende cu sector di casino.
Despues di dialuna kico
E pregunta logico ta bay surgi, si dialuna awo, ora cu e operador cu ta conoci, bisa cu e tin un obligacion cu pa legalmente tur 44 trahado ta riba su nomina di salario. E parti ta si e casino bira mas chikito, si nan tin mester di tur hende si of no. Esey ta un otro capitulo cu tin cu atende cun’e, pasobra si no kier tur e trahadonan, lo tin cu atende cun’e legalmente, sea cu ta yega na un acuerdo cu e trahado cu no lo kier traha mas of ta ofrece y/of ta cana caminda di corte y/o departamento di labor, pa termina e relacion di trabao.
E recomendacion caba ta den todo caso, busca un salida. Mientras tanto, entre 15 y 20 trahado, a haya trabao temporalmente den un cu otro casino, pero logicamente esey no ta pa e problema serio di e trahado, di su entrada. Su entrada cu e tin cu cumpli cu obligacionnan legal, manera cualkier un di nos cu tin nos salario y ta cumpli cu obligacionnan legal tur luna.
E operador TMGR Casino, ta responsabel no solamente pa salario, pero tin di compronde tambe cu ta un caso hopi serio cu nan a lanta bay cu placa di spaar di e trahadonan. Ta resulta cu e casino a opera 4 pa 5 aña, sin un cuenta bancario. Esey ta un asunto hopi serio cu a wordo trata cu minister di labor, aunke esey no ta toca su cartera, pero mediador a reuni hunto cu FTA y cu e manager di e casinonan di Holiday Inn y tambe esun na Riu Antillas, pasobra ta wordo specula cu e dos casinonan aki tin problemanan grandi y a atende dicon, pasobra tin mas di 90% den casa casino y kier evita un sorpresa manera cu a pasa den caso di Aura Casino.
Minister di Labor, Paul Croes, a informa cu e dos casinonan aki por tin nan situacionnan pero no ta asina cu nan lo por bay cera manera ta e caso di Aura Casino. Esun di Holiday Inn ta negoshando pa un contracto di 6 aña cu e operadornan, pero atrobe ta importante pa e trahadonan wordo informa debidamente.
Casinonan den problema?
Tin 12 casino cu esun cu ta cera ta di 13 casino na Aruba. Casinonan ya no ta manera antes pa loke ta tipo di ingreso y pa e haya semper cu e problema cu si e casino no ta pertenece na e hotel. A pasa den un cantidad di caso cu operadornan cu no ta serio, pa uza e palabra suave, y cu pais ta faya ainda pa controla debidamente. A menciona e importancia di un gamingboard cu tur gobierno a trata, lag’e pone un banda,yega hopi leu den discusionnan legal, pero atrobe ta mira cu esey no a cristalisa ainda. Mientras tanto tin 12 casino ta opera. Mester di un analisis urgente y di parti di asociacion di casino a compromete pa duna minister di labor y otronan un informacion exacto, no solamente cuanto trahado tin den casino, kico e ingreso den e casino ta nifica, con ta bay control e situacion den e casino debidamente, sino cada biaha di nobo ta haya cu e sorpresa aki.
Interes
Evidente si ta cu keto bay tin interes di operadornan pa casino. E ora lo por bisa cu si e no ta di e lucrativo ey, con bin ainda tin asina tanto interes. E casinonan awendia no por compara nan cu pasado. Por ehempel e mercado di Venezuela a perde gran parti y logico e turista Mericano ta haya y e turista Local, tambe ta un fenomeno cu tin cu wak’e di cerca. E pregunta logico ta y esey gobierno tin un obligacion di haci, a bolbe pidi pa no solamente bay efectua control, pero haci un analisis profundo den casinonan y e pregunta logico ta, si bay habri mas hotel, mester duna mas licencia pa mas casino na Aruba, mediador a conclui.
