Mediante un comunicado di prensa di Cuerpo di Polis di Aruba, diahuebs ultimo den oranan di anochi a informa cu un meneer di 87 aña a wordo alcansa pa un auto y a lag’e atras sin brinda asistencia.
A informa cu pa 8:40 central di Polis a haya notificacion cu un auto lo mester a alcansa un peaton na Bernhardstraat na altura di Arena’s Sport Bar.
Central di Polis a despacha un patruya di polis como tambe a pone ambulance na altura di e sucedido.
Na yegada di e patruya a haya cu un hende homber di 87 aña riba caminda. E prome informe ta cu un auto color preto lo a alcanc’e y a bandona e sitio. Ambulance a yega na e sitio y a duna e victima di 87 aña asistencia medico y a stabilisa pa asina transporte cu maximo urgencia pa hospital.
Specialista di trafico a presenta na e luga pa asina haci nan investigacion.
Cuerpo Policial a condena rotundamente e hecho aki, na unda ta alcansa un meneer di 87 aña y lag’e atras sin brind’e yudansa.
Te ciere di edicion aki Cuerpo di Polis no a contesta na redactor si a logra haya e persona cu a causa e accidente aki y tampoco den ki estado e persona afecta ta na e momentonan aki.
