E fin di siman aki henter pueblo di Aruba ta invita pa bin pasa un rato ameno y busca e regalo pa Dia di Tata den Caya G.F. Betico Croes. Riba diabierna y diasabra lo tin hopi oferta, pero tambe cos pa scucha, wak y smaak.
Sr. Stanley de Marchena, kende ta coordina esfuersonan conhunto di comerciante y Gobierno, a duna di conoce cu, manera ta custumber, lo tin diferente tent pone pafo di e tienda, como tambe e grupo di Harley Davidson y clubnan di autonan clasico pa admira y saca potret cu nan.
Animacion musical y un ambiente hopi bunita ta cuminsa ya caba for di 10’or di mainta y, danki na e cooperacion di comerciantenan, tiendanan ta keda habri te banda di 8’or di anochi. E idea ta pa pasa un dia hopi agradabel caminda e cumprado ta haya bon oferta, y e comerciantenan tambe ta sali gana.
“E biahanan anterior cu a celebra diferente actividad den Caya Grandi, a bay hopi bon y comerciantenan a keda contento,” asina Sr. de Marchena a comenta. Comercio local tin mester e apoyo di nos mesun hendenan. “Nos mester proteha y alimenta nos comercio local. Bin den Playa y probecha di e tantisimo oferta cu ta bay tin tanto diabierna como diasabra,” de Marchena a enfatisa.
Hopi di e comerciantenan a selecta mercancia di calidad pa pone den promocion y hopi di nan lo tin musica pa crea un ambiente mas ameno. Tiendanan cu tin un margen limita a purba di crea oferta y producto special, como por ehempel, grabacion riba boter di colonia cu mensahe personal, pa haci e regalo pa Tata algo special. Asina tin otro comerciantenan cu a bin cu ideanan creativo.
Comunicado gobierno
