Diabierna proximo lo trata e caso contra e dama nacionalidad Chines cu ta sospechoso den e caso di asesinato na Piedra Plat cu a sosode aña pasa. Segun Ministerio Publico, sospechoso T. ta wordo acusa di a tuma bida di un persona riba 11 di juli 2016 dor di intencionalmnte y cu forza, hink’e varios biaha cu un of mas cuchio na su curazon y pulmonnan, nek y garganta, y dor di dal e cu forza cu un martio na su frenta. A consecuencia di esaki e persona a fayece. E ta wordo acusa tambe di a menasa un persona cu un crimen den e periodo di 6 pa 10 di februari 2017.
Caso
Segun version policial, yamada a drenta pa 9:21 di anochi via centrale post cu un atraco lo a tuma luga na Beauty Health Museum dialuna anochi 11 di Juli.
Na yegada di e patruya a bin topa cu e curpa di Sr. Fingal (59 aña) sin bida anto a detene e dama M.T. na e sitio kende tabata totalmente cubri cu sanger. E dama M.T. tabata conoce Sr. Fingal pa varios aña caba y de hecho tabata practicamente bisiña di Sr. Fingal na Calbas. Segun abogado Chris Lejuez, Sr. Fingal y e dama a palabra cu nan lo topa e dialuna anochi ey 7’or na e sitio na Piedra Plat. Pa evita cu mas cliente lo a bay na e sitio, a pidi Sr. Fingal pa pone su auto na Bright Bakery. Sr. Fingal sin embargo a sugeri pa e dama bin busk’e na Four Seasons anto el a laga su auto eynan para bao di un palo di kwihi.
Segun relato di abogado Lejuez, e dama a considera e tratamento aki como un excepcion solamente pasobra nan ta amigo anto e dama normalmente no tabata duna massage na hende homber. “El a yega di haci e solamente pa Chines pero ora cu e Chines bin cu e casa,” Sr. Lejuez ta bisa. Cos a cuminsa bay robes ora cu Sr. Fingal a cuminsa papia cu e dama, 30 pa 40 minuut despues di e tratamento, bisando e cu “e ta hay’e bunita, cu e stim’e y pa hopi tempo ta hay’e bunita.” Aunke cu e dama tabata bis’e pa stop, Sr. Fingal a continua te ora cu el a tene e dama di tal forma na su curpa cu e dama no por a move su man. Akinan un confrontacion a start caminda cu a termina cu hinca den garganta di Sr. Fingal cu a causa su morto.
