Segun resumen di ayera di Departamento di Salubridad Publico DVG pa e cifranan di pandemia di coronavirus na Aruba, ayera a registra un total di 84 caso nobo di Covid-19. Sinembargo, diabierna ultimo a registra 262 caso, cu ta bira e mayor cantidad di caso den un solo dia desde inicio di e pandemia na maart di 2020.
Cu 84 caso nobo y 69 persona cu a recupera di e malesa, e cantidad total di caso activo di Covid-19 pa ayera tabata 807. Di e 84 caso nobo di Covid-19 cu a registra ayera, 12 ta turista y 72 ta residente. E cifranan aki ta representa un tasa di positividad entre nos residentenan di 31%. Segun Organisacion Mundial di Salud (WHO), un tasa di positividad mayor di 5% ta indica cu tin cantidad grandi di persona infecta cu no a bay haci un test ainda, pues probablemente e berdadero cantidad di caso activo na Aruba ta mas halto cu loke ta detecta door di haci test.
E cantidad di fayecido relaciona cu Covid-19, e malesa causa pa e virus SARS-CoV-2, ta 111.
Segun DVG, e datonan ta ilustra un aumento continuo di casonan nobo, cu un averahe semanal di 108 caso pa dia y un averahe di tasa di positividad semanal di 30% pa dia, cu ta sigui subi. Dia 6 di augustus ultimo tabatin e mayor cantidad di caso positivo den un solo dia, desde inicio di e pandemia, cu 262 caso. Prome cu esey, e dia cu mas cantidad di caso positivo tabata dia 16 di september 2020, cu 176 caso.
Hospital tin 23 persona interna di cual 4 ta den Unidad di Cuido Intensivo, 18 riba piso general y 1 riba piso di maternidad. Datonan di hospital ta ilustra cu di esnan ingresa den hospital cu Covid-19, 21 persona no tin ningun vacuna y solamente 2 persona ta vacuna. Esnan interna den ICU ningun ta vacuna.
