Departamento di Impuesto ta recorda cu diabierna awor, dia 30 di september 2016, e siguiente termino di pago di grondbelasting 2016 ta caduca. Pa e fecha aki tur cliente mester tin por lo menos 75% di e suma di cobransa paga. Esaki ta conta pa e clientenan cu no tin un areglo di pago.
Si no cumpli cu pago (na tempo) den caso cu un cliente no paga manera ta stipula den ley, automaticamente Departamento di Impuesto lo continua cu e proceso di recaudacion presiona (dwanginvordering). Mescos ta conta pa un cliente cu no a paga suficiente of no a cumpli cu su areglo di pago. E proceso di recaudacion presiona ta encera cu un cliente lo ricibi un recordatorio di pago cu un gasto adicional di Afl. 10,-, un ordo di retencion riba salario (loonvordering) y/of dwangschrift.
Alabes ta importante pa menciona cu e debe di impuesto cu ta habri por aumenta cu gasto di interes. Teniendo na cuenta cu e proceso di recaudacion presiona por bira gradualmente mas severo, Departamento di Impuesto kier stimula y recomenda tur cliente pa cumpli cu e pagonan stipula den ley pa asina evita no solamente gasto adicional pero tambe un situacion menos agradabel. Ta importante pa menciona cu si acaso un cliente no por paga su cobransa dentro di e termino stipula pa ley, e cliente lo por acudi libremente na e oficina principal di Departamento di Impuesto pa cera un areglo di pago.
