Dia15 di maart 2020 ta dia Mundial di Derechonan di Consumidor ,riba e dia aki organisacionnan di consumidornan rond di mundo,den coordinacion cu Consumers International, ta reuni pa haci peticion pa cambionan global y duradero pa evita collapse ambiental resaltando e proteccion y empoderamiento di e consumidor rond mundo.
Considerando cu actualmente nos ta encontrando un crisis ambiental,causando e.o. cambio climatico y perdida di biodiversidad, ta urgi medidanan drastico pa aborda e crisis mundial aki.
Den e cuadro aki lo destaca e cambionan cu e consumidor por haci y cu gobierno y companianan mester ehecuta pa por haci sostenibilidad un opcion mas facil pa e consumidornan.
E crisis cu nos ta enfrentando ta asina urgente cu nos tur tin cu uni y tuma nos responsabilidad pa por resolve.
E demanda di producto sostenibel ta aumentando, specialmente entre consumidornan mas hoben. E campaña ta enfoca particularmente ariba hobennan, mirando e activismo den e generacion encuanto e tema.
E decada aki ta nos ultimo oportunidad pa limita calentamiento global. Pa logra esaki nos mester reduci emision di gasnan di efecto invernadero (GEI), desperdicio y haci uso di recurso di tur sector.
Un forma pa logra esaki ta haciendo cu e manera di produci y consumi ta mas sostenibel. Pa e consumidor e consumo sostenibel ta trata di haci mas cu lo menos, por ehempel, cambia pa productonan energeticamente eficiente, intercambia alimento, huur of cumpra cosnan segunda mano y tambe uso consciente di awa, coriente of combustible.
For di un estudio global por conclui cu 66% di consumidornan ta bisa cu nan ta dispuesto pa paga mas pa productonan sostenibel, pero locual ta limita nan ta barera nan manera e prijs, disponibilidad y falta di informacion.
E consumidor tin un papel hopi importante den e cuadro di sostenibilidad, sinembargo nan no por logra e meta akinan so.
Ta urgi Gobierno y companianan tambe pa actua pa crea cadena di suministro mas sostenibel, eliminando desperdicio ineficiencia den produccion prome cu e productonan yega na tiendanan, creando e posibilidad pa reciclahe y asegurando cu e consumidornan haya e informacion necesario pa por tuma decisionnan responsabel.
Gobierno y companianan tambe tin cu demostra liderazgo internacional mediante establecimento y condicion di obhetivonan di ambicion pa limita e calentamiento global promoviendo e sostenibilidad den consumo.
Dienst Huuren- Consumentenzaken (DHC), cual departamento ta resorta bou di Ministerio di Asuntonan Social y Labor ta e departamento di gobierno encarga cu promocion di consumo responsabel, informando consumidornan encuanto producto y servicionan.
Den cuadro di e tema y desaroyonan mundial, e vision di Gobierno y tambe e metanan (Mundial) pa Desaroyo Sostenibel, e asina yama “Sustainable Development Goals” (SDG’s) di Nacionnan Uni, meta SDG 12 cual ta trata sostenibilidad,pronto DHC lo conoce un structura nobo pa asina por duna un sosten mas amplio y al dia na e consumidor resaltando e proteccion y empoderamiento di e consumidor.
