Ayera tabata un dia scur pa nos pais y democracia, cu huramentacion di un parlamentario cu a caba di sali di prison preventivo, y ta e acusado principal ainda den un di e casonan mas grandi di corupcion cu nos pais a yega di conoce. Mientras e investigacion tabata andando, e persona a haci bon uso di su derechonan como ciudadano pa postula su mes riba lista di su partido, cu a aplaudi e decision aki y a apoy’e di tur manera durante y despues di campaña electoral. Awor cu e ta liber, bao cierto condicion, e tin tur derecho di hura como parlamentario y bay haci su trabao como tal.

Si tin ciudadano cu ta mira esaki como un farsa, un mancha riba nos democracia, nan lo mester dirigi palabra na esnan cu efectivamente por haci algo. Y esnan cu por haci algo ta e actual parlamento, cu riba propio iniciativa o den colaboracion cu gobierno por propone un cambio di Constitucion y unda por ehemplo ta adopta e stipulacionnan cu St Maarten tin den nan constitucion, cu ta preveni cu un parlamentario o ministro por keda sinta ora tin acusacion di e gravedad aki contra nan. Pasobra, laga ta bon cla, no ta acusa e politico di a pasa den luz cora ni di a core auto cu exceso di velocidad. E acusacion ta un serie di delito relaciona cu otorgamento di tereno, durante e gobernacion di cual e acusado tabata forma parti, y den cual e tabata na cabez di e parti ey di poder gubernamental y tabata tuma decision.

Pero kico nos ta mira? Nos tambe ta scucha e lamentonan cu e berguenza aki ta posible, pero nos a tende un politico bisa cu mester haci algo al respecto, cambiando ley? En todo caso no di e dos partidonan grandi. Di esun cu ta conta e parlamentario sospechoso entre su elenco pa parlamento sigur no por spera nada, al contrario. Nan lo continua cu nan euforia tocante e sucesonan di ultimo dianan y muy probablemente den e proximo añanan lo usa nan representacion den parlamento pa bloquea cualkier propuesta den e sentido aki. “No ta problema,” nos ta tende hende bisa. Tin 14 otro voto den parlamento cu por percura pa e mayoria di 2/3 parti cu mester pa cambia Constitucion. Esey ta berdad, pero nos no ta mira, specialmente e partido grandi den gobierno, actual y proximo, bay apoya o hasta inicia un tal proyecto di ley. Y pakico no?

Pasobra nos no a mira nunca un propuesta di ley cu ta duna mas forza na nos cuadro legal cu ta restringi e espacio di maniobra di politico, di cualkier color. Hasta ta asina cu e instrumentonan pa reforza democracia popular, vigente na tur otro parti di Reino, ainda aki no por funciona. A pasa e ley di Ombudsman, despues di siglos, pero te ey tambe. Financiamento lo ta un excusa hopi barata, pasobra nos no a mira austerisacion den lease di auto caro y otro gastonan innecesario cu ta sigui core normal.

Ademas, nos mester mira e promer iniciativa ainda pa pone un paro na corupcion den aparato gubernamental di Aruba. A destrui tur sorto di control interno den e departamentonan, a percura cu Servicio di Auditoria tin menos empleado cu 20 aña pasa mientras trabao a duplica, nos tin un Algemene Rekenkamer cu no por bay directamente na Ministerio Publico ora nan topa cu delito, etc. A pone control di finanzas di partido politico den man di Conseho Electoral cu no tin ni sikiera un secretario… Envez di mehora control, ta parce cu ta hari ta hari pueblo den su cara y no ta cambia nada. Pa nos no papia mes di e proyectonan manera Integriteitskamer, cu a keda den estado di embrio y probablemente lo conoce un aborto mas o menos espontaneo proximamente. Pero esey no ta tur. E problema ta cu hasta den e mesun ministerio y departamentonan envolvi den e escandalo mas grandi di nos historia te awor, no a mehora nada y, ‘as we speak’, tin investigacion andando contra e top di e departamento pa e mesun tipo di delito pa cual e ya menciona parlamentario lo mester confronta Corte algun momento otro aña.

Ta pesey den su discurso despues di huramenta ayera, e parlamentario sospechoso a referi na e posibilidad cu Ministerio Publico lo bati na porta di Ministro Presidente, como actual responsable di e cartera di Infrastructura. Nos ta tende e promer mandatario ta bisa caba: “Cree el ladrón que todos son de su condición.” Pa e ta sigur cu esey ta asina, e lo mester demostra anto cu ta caba ‘de una vez por todas’ cu corupcion cu tereno na e departamento.

Awor, kico tur esaki ta significa pa nos como ciudadano? Cu nos tin varios interes cu mester keda atendi na e lugar corecto. E parlamentario por wel di ta liber y bisa loke e kier, tardi o tempran e lo mester bay dilanti mesa berde – otro color berde – pa duna cuenta di kico a pasa. Por lo pronto e ta mantene su inocencia, ta na corte pa dicidi kico ta berdad. E otro asunto ta cu nos no kier pa e cosnan aki keda ripiti, y esey ta trabao di gobierno. Nos no ta mira e disposicion pa cambio, ainda.