Awe, dia 27 di september ta celebra Dia Mundial di Turismo. E dia aki a ser scogi den aña 1980, pa motibo cu e dia aki ta marca e aniversario di e adopcion di Statutes of the Organization den aña 1970, cual ta loke a habri caminda pa e establecimento di United Nations World Tourism Organization.
Pa Aruba en particular, e fecha aki ta uno special pa motibo cu e ta marca e celebracion di un di e pilarnan mas importante di nos economia. Un pilar cu awo ta forma parti di nos cultura y ta forma un parti di e imagen cu resto di mundo tin di Aruba. Aruba ta sumamente elogia pa su trabao den e industria di turismo y esaki ta danki na tur e personanan cu ta dedica nan mes na brinda e miho servicio posibel na nos turistanan.
Un di e personanan aki ta Yvette Tromp, ken tin 23 aña trahando den e industria di turismo como Concierge di Playa Linda Resort. Su trabao ta enfoca den yuda e bishitantenan cu tur nan necesidadnan pa asina nan vakantie por cana sin ningun problema, un trabao cu e ta haci cu amor y pasion tur dia.
E ta conta cu loke e mas gusta di su trabao ta cu “bo ta crea un vinculo cu nan y nos ta bira manera un famia pasobra Aruba ta nan cas leu for di cas. Mi ta conocenan y e no ta laaf pasobra no ta mescos tur dia, tin variacion, pero e ta e mesun bishitantenan cu ta bin back.”
Pa Yvette, turismo ta manera nan ta bisa na Spaño; ‘mi casa es tu casa’. “E bishitantenan ta bin y por ta e ta nan prome biaha cu nan ta bishita e isla, mi kier duna e sabor di Aruba. Kico pa haci, kico nan no por perde di haci y no haci cos turistico so, un poco mas e experiencia local y tur e joyanan scondi,” el a expresa.
