Dia Mundial di Turismo: ‘Turismo y Trabou – Un miho futuro pa tur’

Organisacion di Turismo Mundial di Nacionnan Uni a declara dia 27 di september como Dia Internacional di Turismo, cu tema e aña aki: ‘Turismo y trabou – un miho futuro pa tur’. No por a scoge un miho tema pa Aruba. Turismo ta nos pilar economico principal, y fuente number un di ingreso pa e poblacion.

Relaciona cu e dia aki, Aruba Tourism Authority (ATA) ta organisa un conferencia y ta invita studiantenan di universidad y di scolnan vocacional, y tambe bishita scolnan secundario. Esaki den marco di e meta di Nacionnan Uni, pa educa publico tocante e importancia di industria di turismo, pa mobilisa boluntad politico y recursonan pa atende cu problemanan global, y pa celebra y reforsa logronan di hende trahando den turismo.

Alrededor di ¾ di GDP di Aruba ta gana a traves di turismo y actividadnan relaciona. Mayoria di turista ta bin di Nort America, cu 73.3% di e mercado, sigui pa America Latino cu 15.2% y Europa cu 8.3%. Den transcurso di 2018, Aruba a duna bon bini na un total di 1,082,003 bishitante stay-over.

Crecemento global.
Segun e pagina di internet di Nacionnan Uni, durante ultimo seis decada, turismo a experiencia expansion y diversificacion continuo, y a bira un di e sectornan economico mas importante y creciendo mas lihe den mundo, beneficiando destinacionnan y comunidadnan rond mundo. Yegada di turistanan internacional rond mundo a crece for di 25 miyon na 1950 na casi 1.3 biyon awendia. Similarmente, entrada internacional di turismo pa destinacionnan rond mundo a crece for di $2 biyon na 1950 te cu $1260 triyon na 2015. E sector ta representa aproximadamente 10% di GDP mundial, y un di cada 10 trabou mundialmente. Organisacion di Turismo Mundial di Nacionnan Uni (UN World Tourism Organization, UNWTO) ta spera cu turismo lo sigui crece na un averahe di 3% anualmente te cu aña 2030. E crecemento aki ta refleha e expansion progresivo di acceso na turismo, danki na e disminucion den prijs di transporte, particularmente aereo, y e crecemento di clase economico medio mundialmente. E reconocemento di derecho di vakantie den e Declaracion Universal di Derechonan Humano, y e adopcion di miho derechonan laboral den varios pais, tambe a sostene e crecemento di turismo. E factornan aki tambe ta sirbi como un marco pa e resiliencia demostra pa turismo den añanan recien. E sector a experiencia crecemento casi sin interupcion, a pesar di retonan manera crisis economico global, desaster natural, y pandemica.

Puntonan di Presion.
Cu un porcentahe halto di e poblacion di e isla dependiendo riba turismo pa nan entrada, comunidad local ta expresa un apreciacion halto pa bishitantenan di Aruba, resultando den feedback tremendo for di turistanan pa cu servicio y oferta. Sinembargo, ta inevitabel cu algun reto ta bin cu e cantidad di hende agrega na e poblacion local ademas di un necesidad pa infrastructura, utilidad, cuminda y alohamento. Riba rednan social, discucionnan tin un tendencia – entre otro – tocante e efectonan negativo riba naturalesa causa pa uzo di ATVs pa nos turistanan. Doñonan di trabou den e industria ta keha tocante falta di empleadonan, y e turistanan ta menciona e aumento den construccion di resort y condominionan nobo. Nan kier pa e isla mantene su caracteristicanan unico manera trankilidad, siguridad y servicio top, na cual nan a custuma. No por nenga, de hecho, cu ta existi puntonan di presion, pero discusion ta un manera sano pa adresa gobierno pa asina preserva e balronan di e isla.

ATA a set up un programa special yama ‘Mi Promesa pa Aruba’, cual ta stimula hendenan local, como tambe bishitantenan, pa cuida medio ambiente y cultura di Aruba, pa yuda preserva e isla pa futuro generacionnan. E programa ta inclui reglanan pa comportamento y informacion pa educa con pa sigura Aruba sigui ta un Isla Dushi.