Ayera 3 di mei, Dia Mundial di Libertad di Prensa, secretario general di Nacionnan Uni, Antonio Guterres a duna un mensahe na unda el a expresa cu periodistanan y trahadonan den media ta crucial pa yuda tuma decisionnan bon informa, mientras cu periodistanan di Aruba ta organisa pa tin periodismo como fuente primario y confiabel di noticia.

“Riba Dia Mundial di Libertad di Prensa, nos ta pidi gobiernonan – y otronan- pa garantisa cu periodista por haci nan trabao durante e pandemia di COVID-19 y despues”, Guterres a expresa.

Mientras cu e pandemia ta plama, el a duna bida tambe na un di dos pandemia cu ta e desinformacion, di consehonan pa salud peligroso te cu teorianan di conspiracion exorbitante.

Prensa lo MESTER por duna e antidoto contra desinformacion: noticia verifica, cientifico, basa riba hecho comproba y analisis. Pero desde cu e pandemia a cuminsa, hopi periodista ta ser someti na un cantidad creciente di restriccion, castigo y represalia simplemente cumpliendo cu nan trabou.

Limitacionnan temporario riba e libertad di move ta esencial pa domina y elimina COVID-19. Pero nan no por ser abusa y sirbi como pretexto pa baha pisa riba periodista, strobando nan pa haci nan trabao.

Awe, nos ta gradici e medionan di prensa pa suministra hecho y haci analisis; pa pone lidernan-den tur sector- duna cuenta y ta responsabel, tambe pa por bisa e berdad den cara di esunnan den poder.

Nos ta reconoce den particular esunnan cu ta desplegando un papel comunicando informacion riba salubridad publico cu ta yuda salba bida.

“Nos ta haci un yamado na tur gobierno pa proteha esunnan cu ta trahando den medionan di prensa, y pa fortalece y mantene libertad di prensa, cual ta esencial pa e futuro di paz, husticia y derechonan humano pa un y tur”, Guterres a finalisa.

Di otro banda, na Aruba a crea e organisacion nobo pa miembronan di prensa di Aruba, denomina ‘Asociacion Arubiano di Prensa (ASAP)’ na unda nan a trece dilanti cu rol di prensa ta esencial na henter mundo, asina tambe den tempo di pandemia.

Den un comunicado na unda nan a duna di conoce e organisacion, nan a señala cu aworaki den temponan di incertidumbre causa pa e pandemia COVID-19, mundo ta para keto dia 3 di mei, Dia Mundial di Libertad di Prensa pa celebra e hecho cu publico tin derecho riba informacion liber y cu nan tin periodismo como nan fuente primario y confiabel di noticia.

Desde 11 di april di aña aki, un grupo di persona a reuni cu e proposito pa funda y organisa un asociacion (vereniging), considerando cu pa hopi aña caba no tin un organisacion activo pa atende cu e derechonan di periodistanan y desaroyo di periodismo en general na Aruba.

Tambe cu tin necesidad awor pa trahadonan den medionan di comunicacion tin un asociacion profesional pa regula y maneha nan mesun forma di funciona, teniendo na cuenta e responsabilidad di tur sector den e comunidad di Aruba y saliendo for di e principio di respet mutuo y cu comunidad ta depende mas y mas di medionan di comunicacion pa ta bon informa.

E trabou pa ofrece calidad di contenido ta algo hopi caro y cu tin su riesgonan den banda aki, cu periodistanan y editornan mester filter e data cu rigor y precision. Hopi biaha, nan mester tuma riesgonan pa pasa restriccion- y limitacionnan den diferente forma pa tin acceso na informacion scondi, observando, puntrando, investigando, denunciando, exponiendo, criticando, mustrando formanan nobo y treciendo solucionnan ta e contribucion usual di un bon periodismo.

Asina mes, nan a señala cu ta di lamenta cu e pandemia a debilita e basenan financiero di hopi media na mundo y tambe aki na Aruba. Avisonan y circulacion a cay rapidamente door di recesion economico, cu e consecuencianan cu a forsa hopi reduccion di personal y di periodistanan.

Ta balora e determinacion di media y periodismo cu ta trahando den tempo di restriccion pa haya acceso na fuentenan door di estado di emergencia, manera indica na Aruba, Chile, El Salvador, Trinidad y Tobago, entre otro paisnan. Riba e dia special aki, no kier ignora e hecho cu ainda nos ta biba den un region cu tur dia ta test e curashi di periodismo. “Nos ta condena violencia y falta di castigo pa crimen contra periodismo”, ASAP a sigura.

Ademas, ASAP a laga sa cu nan ta atendiendo aspectonan legal. Nan a cuminsa cu recluta miembronan pa pasa door di e proceso di acreditacion, cu e obhetivo di traha uni y hunto, pa por logra enfrenta retonan den nos trabou diario, tanto na nivel di Gobierno, cu autoridadnan competente y den otro aspectonan di e trabou periodistico.

E prome directiva di ASAP ta conforma pa 7 miembro, cual ta: Miriam ‘Mimi’ Koolman-Rosel (Presidente), Raymond Hoek (Vice-Presidente), Nilton Lacle (Tesorero); Mark Benson Denz (Secretario), Marko Espinoza (Secretario Internacional), Maritza Faro (Comisario di Miembresia) y Edmond Croes (Comisario).

Pa finalisa, esaki ta pa tin contacto estrecho cu otro organisacionnan den Reino Hulandes y internacionalmente pa por promove mas sinergia y aliansa cu e asociacion Arubiano. E aliansanan aki lo mester conduci den mas cooperacion, miho preparacion y educacion di esunnan cu tin como trabou di tur dia, pa informa nos pais.